شالقار قالاسىنىڭ بۇرىنعى اكىمى زاڭگەرلىك كومەككە 4 ملن تەڭگە بەرىپ، الاياقتىق قۇربانى بولدى، دەپ حابارلايدى "ادىرنا" ۇلتتىق پورتالى.
اقتوبە قالاسىنىڭ №2 سوتىندا الاياقتىق دەرەگى بويىنشا قىلمىستىق ءىس قارالدى. ءىس ماتەريالدارىنا سايكەس، سوتتالۋشىلار ت. اقبوتا مەن س. قالامقاس بىرنەشە ادامدى الداپ، زاڭسىز اقشا يەمدەنگەن. قىلمىستىق ءىس جەتى ەپيزودتان تۇرادى، ونىڭ ءبىرى شالقار قالاسىنىڭ بۇرىنعى اكىمىنە قاتىستى.
سوت مالىمەتىنشە، س. قالامقاس اقتوبە وبلىسى زاڭگەرلەر پالاتاسىنىڭ مۇشەسى بولا وتىرىپ، 2022 جىلدىڭ تامىز ايىندا شالقار قالاسىنىڭ ەكس-اكىمىنە قۇقىقتىق كومەك كورسەتىپ، ونىڭ قورعاۋشىسى بولۋعا ۋادە بەرگەن. الايدا ول زاڭ بويىنشا مۇنداي قىزمەتتى اتقارا المايتىنىن بىلە تۇرا، جابىرلەنۋشىنى جاڭىلىستىرعان.
كۇدىكتى كورسەتىلەتىن قىزمەت ءۇشىن 8 ملن تەڭگە سۇراپ، ونىڭ العاشقى جارناسى رەتىندە 4 ملن تەڭگە العان. جابىرلەنۋشى كەلىسىلگەن سومانى كەلەسى كۇنى قولما-قول تاپسىرعانىمەن، تاراپتار اراسىندا ەشقانداي كەلىسىمشارت جاسالماعان.
بەلگىلى بولعانداي، بۇرىنعى اكىم 2021 جىلى قىلمىستىق كودەكستىڭ «سالعىرتتىق» بابى بويىنشا كىنالى دەپ تانىلىپ، 4 جىلعا باس بوستاندىعىن شەكتەۋ جازاسىنا كەسىلگەن.
تەرگەۋ بارىسىندا ت. اقبوتا مەن س. قالامقاستىڭ 2021 جىلى «سامۇرىق-قازىنا» اق ارقىلى مەملەكەتتىك باعدارلاما اياسىندا جالدامالى پاتەر الىپ بەرەمىز دەگەن جەلەۋمەن دە ازاماتتاردى الداعانى انىقتالدى. ولار الماتى، استانا جانە اقتوبە قالالارىنداعى بىرنەشە تۇرعىن ءۇي كەشەنىنەن باسپانا الۋعا كومەكتەسەمىز دەپ ۋادە بەرىپ، ازاماتتاردان اقشا العان.
سوت ۇكىمىمەن ت. اقبوتا الاياقتىق جاساعانى ءۇشىن 6 جىلعا باس بوستاندىعىنان ايىرىلدى. كامەلەتكە تولماعان بالاسىنىڭ بولۋىنا بايلانىستى ونىڭ جازاسىن وتەۋى ءۇش جىلعا كەيىنگە قالدىرىلدى. ال س. قالامقاس 6 جىلعا باس بوستاندىعىنان ايىرىلدى.
سوت جابىرلەنۋشىلەردىڭ ازاماتتىق تالاپتارىن ءىشىنارا قاناعاتتاندىرىپ، س. قالامقاستى شالقار قالاسىنىڭ بۇرىنعى اكىمىنە 4 ملن تەڭگەنى قايتارۋعا مىندەتتەدى.
سوت ۇكىمى زاڭدى كۇشىنە ەنگەن جوق.
