يلحام اليەۆ ازەربايجان قاۋىپسىزدىك كەڭەسىنىڭ وتىرىسىندا يران تاراپىنا قاتىستى قاتاڭ مالىمدەمە جاسادى، دەپ حابارلايدى "ادىرنا" ۇلتتىق پورتالى.
مەملەكەت باسشىسى ناحچىۆان اۋماعىنا جاسالعان سوققىلاردى «تسينيزم مەن وپاسىزدىق» دەپ باعالادى.
پرەزيدەنتتىڭ ايتۋىنشا، ءدال سول كۇنى تاڭەرتەڭ يران سىرتقى ىستەر ءمينيسترىنىڭ ورىنباسارى باكۋگە حابارلاسىپ، ازەربايجان تاراپىنان ليۆاندا قالعان يران ەلشىلىگى قىزمەتكەرلەرىن ەۆاكۋاتسيالاۋعا كومەك سۇراعان. سەبەبى ولار بۇل جۇمىستى ءوز كۇشتەرىمەن اتقارا المايتىنىن جەتكىزگەن.
يلحام اليەۆتىڭ سوزىنشە، بۇل وتىنىشتەن كەيىن ول بىردەن ءتيىستى قۇرىلىمدارعا ۇشاق جىبەرىپ، كومەك كورسەتۋ تۋرالى تاپسىرما بەرگەن. ءتىپتى يران تاراپى ەۆاكۋاتسيا شىعىندارىن تولەۋگە دايىن ەكەنىن ايتقانىمەن، ازەربايجان پرەزيدەنتى مۇنداي قيىن جاعدايدا كومەك كورسەتۋدىڭ اقىسىز جۇزەگە اساتىنىن جەتكىزگەن.
سوعان قاراماستان، ناحچىۆانعا سوققى جاسالعانى ازەربايجان باسشىسى تاراپىنان قاتاڭ سىنعا ۇشىرادى.
«ال سوعان قاراماستان ناحچىۆانعا سوققى بەرۋ — تسينيزم، وپاسىزدىق جانە تومەندىك. بۇل ماسقارا ولاردىڭ لاس ءارى جيىركەنىشتى بەتىندە ەشقاشان وشپەيدى»، — دەدى ازەربايجان پرەزيدەنتى.
ايتا كەتەيىك، ناحچىۆان — ناحچىۆان اۆتونوميالىق رەسپۋبليكاسى، ازەربايجاننىڭ نەگىزگى اۋماعىنان بولەك ورنالاسقان ستراتەگيالىق ماڭىزدى ءوڭىر.
