حاماس ءتورت تۇتقىننىڭ دەنەسىن قىزىل كرەست ۇيىمىنا تاپسىردى. بۇل تۋرالى ۆۆس جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ءتورت ادامنىڭ دەنەسى يزرايلگە جەتكىزىلدى. قۇرباندار اراسىندا 7 قازاندا يزرايل تراگەدياسىنىڭ سيمۆولىنا اينالعان سارى شاشتى ۇلدار اريەل مەن كفير بيباس، سونداي-اق ولاردىڭ اناسى شيري مەن 83 جاستاعى ودەد ليفشيتس بار.
ۆۆس مالىمەتىنشە، حاماس قىزىل كرەست ۇيىمىنا ءتورت تابىتتى بەرگەن. ولاردىڭ ارقايسىسىندا كەپىلگە الىنعانداردىڭ شاعىن فوتوسۋرەتتەرى بولعان. قىزىل كرەست تابىتتاردى گازا سەكتورىنداعى تساحال كۇشتەرىنە تاپسىرعان.
مايىتتەردى قابىلداعاننان كەيىن يزرايل ارمياسىنىڭ باس ءراۆۆينى قىسقا ءراسىم وتكىزدى. مايىتتەر يزرايل تۋىمەن ورالعان تابىتتاردا ەلگە جەتكىزىلگەن.
يزرايل مايىتتەردى انىقتاۋ ءۇشىن تەكسەرۋ جۇرگىزەدى. بۇل پروتسەسس 48 ساعاتقا دەيىن سوزىلۋى مۇمكىن. حاماس گازا سەكتورىنداعى سوعىس باستالعاننان بەرى العاش رەت تۇتقىنداردىڭ مايىتتەرىن يزرايلگە تابىستاپ جاتىر.
يزرايل پرەزيدەنتى يتسحاك حەرتسوگ جان ءتاسلىم ەتكەندەردەن كەشىرىم سۇرادى.
«يزرايل مەملەكەتى اتىنان باسىمدى ءيىپ، كەشىرىم سۇرايمىن. سول قورقىنىشتى كۇنى سىزدەردى قورعاي المادىم. ۇيگە امان-ەسەن جەتكىزبەگەنىم ءۇشىن كەشىرىڭىزدەر»، - دەپ جازدى ول X الەۋمەتتىك جەلىسىندە.
مايىتتەردى قىزىل كرەست ۇيىمىنا تاپسىرار الدىندا حاماس كەپىلگە الىنعانداردىڭ يزرايل اۋە شابۋىلىنان قازا تاپقانىن حابارلادى. ولار «كەپىلدەگىلەردى قورعاۋ» جانە «ولاردىڭ ءومىرىن ساقتاپ قالۋ ءۇشىن قولدان كەلگەننىڭ ءبارىن جاساعانىن» مالىمدەگەن.
يزرايل بۇل مالىمدەمەلەردى راستاعان جوق. دەنساۋلىق ساقتاۋ ءمينيسترى ۋريەل بۋسسو مايىتتەردى تەكسەرۋ بارىسىندا مۇمكىندىگىنشە ولاردىڭ ءولىم سەبەبىن دە انىقتايتىنىن تىلگە تيەك ەتتى.
