يراندا ەكونوميكالىق نارازىلىقتاردىڭ جالعاسۋىنا بايلانىستى ەلدىڭ رەسمي وكىلدەرى اقش-قا قاتال ەسكەرتۋ جاساپ، كەز كەلگەن سىرتقى ارالاسۋدى ۇلتتىق قاۋىپسىزدىككە تونگەن قاۋىپ رەتىندە باعالايتىندارىن مالىمدەدى، دەپ حابارلايدى “ادىرنا”.
يراننىڭ رۋحاني كوشباسشىسىنىڭ ۇلتتىق قاۋىپسىزدىك ماسەلەلەرى جونىندەگى كەڭەسشىسى ءالي شامحاني جۇما كۇنى يراننىڭ قاۋىپسىزدىگى "قىزىل سىزىق" ەكەنىن ايتىپ، كەز كەلگەن ارالاسۋعا قاتاڭ جاۋاپ قايتارىلاتىنىن ەسكەرتتى.
بۇل مالىمدەمە اقش پرەزيدەنتى دونالد ترامپتىڭ يرانداعى نارازىلىق بىلدىرۋشىلەردى قولداۋ تۋرالى ايتقان سوزدەرىنە جاۋاپ رەتىندە جاسالدى.
شامحاني X الەۋمەتتىك جەلىسىندە جاريالاعان جازباسىندا، يراننىڭ قاۋىپسىزدىگىنە ارالاسۋ ارەكەتتەرىنە دەرەۋ تويتارىس بەرىلەتىنىن اتاپ ءوتتى. ول سونداي-اق يران حالقى اقش-تىڭ "قۇتقارۋ" ارەكەتتەرىنىڭ سالدارىن جاقسى بىلەتىنىن ايتتى. ونىڭ پىكىرىنشە، يراك پەن اۋعانستانداعى، سونداي-اق گازا سەكتورىنداعى مىسالدار اقش-تىڭ مۇنداي ارالاسۋلارى وڭىردەگى تۇراقسىزدىق پەن بەيبەرەكەتسىزدىككە اكەپ سوعاتىنىن كورسەتكەن.
يراننىڭ باسقا دا رەسمي تۇلعالارى وسىعان ۇقساس پىكىرلەرىن ءبىلدىردى. مىسالى، يراننىڭ ۇلتتىق قاۋىپسىزدىك جونىندەگى جوعارى كەڭەسىنىڭ حاتشىسى ءالي لاريدجاني اقش پەن ءيزرايلدى يرانداعى نارازىلىقتاردى ورشىتۋگە ايىپتاپ، يراننىڭ ىشكى ىستەرىنە ارالاسۋ اقش-تىڭ تاياۋ شىعىستاعى مۇددەلەرىنە زيان كەلتىرۋى مۇمكىن ەكەنىن ايتتى.
ءلاريدجانيدىڭ ايتۋىنشا، اقش-تىڭ يراننىڭ ىشكى ماسەلەلەرىنە ارالاسۋى بۇكىل وڭىردە تۇراقسىزدىق تۋعىزىپ، امەريكالىق مۇددەلەردىڭ كۇيرەۋىنە اكەلۋى ىقتيمال.
يراننىڭ سىرتقى ىستەر مينيسترلىگىنىڭ رەسمي وكىلى ەسمايل باگاي يران حالقى ەل ىشىندەگى ماسەلەلەردى شەشۋگە شەتەلدىك ارالاسۋعا جول بەرمەيتىنىن ايتتى. ول 1953 جىلعى توڭكەرىس، يران-يراك سوعىسى كەزىندە يراكتى قولداۋ، 1988 جىلى يراندىق جولاۋشىلار ۇشاعىنىڭ اتىپ ءتۇسىرىلۋى، سونداي-اق سانكتسيالىق قىسىم مەن 2025 جىلى يران ينفراقۇرىلىمىنا جاسالعان سوققىلاردى مىسالعا كەلتىرىپ، مۇنداي ارەكەتتەردىڭ حالىقارالىق قۇقىقتى ورەسكەل بۇزۋ ەكەنىن اتاپ ءوتتى.
يرانداعى ەكونوميكالىق نارازىلىقتار بىرنەشە كۇن بويى جالعاسىپ كەلەدى. نارازىلىقتاردىڭ باستى سەبەبى — ۇلتتىق ۆاليۋتانىڭ قۇنسىزدانۋى مەن باعانىڭ ءوسۋى. ەل ۇكىمەتى ديالوگقا دايىن ەكەندىگىن ايتقانىمەن، شەرۋشىلەردىڭ ازىرگە بىتىمگە كەلەر ءتۇرى بايقالمايدى.
