قوستاناي قالاسىندا وڭىرلىك كواليتسيا وكىلدەرىنىڭ "قوستاناي سۋ" كوممۋنالدىق كاسىپورىن قىزمەتكەرلەرىمەن كەزدەسۋى ءوتتى. كەزدەسۋدىڭ باستى تاقىرىبى جالپىۇلتتىق رەفەرەندۋمعا شىعارىلعان كونستيتۋتسيالىق رەفورما جانە ونىڭ ەلدىڭ الەۋمەتتىك-ەكونوميكالىق دامۋىنا اسەرى بولدى.
ءىس-شاراعا وڭىرلىك كواليتسيا مۇشەلەرى قادىرعالي جامانبالين، مانارا مادينينا جانە ايدا سەريكوۆا قاتىستى. اشىق ديالوگ بارىسىندا ولار جاڭارتىلعان كونستيتۋتسيا جوباسىنىڭ نەگىزگى ەرەجەلەرىنە توقتالىپ، ۇسىنىلىپ وتىرعان وزگەرىستەردى جان-جاقتى ءتۇسىندىردى.
قادىرعالي ءجامانباليننىڭ ايتۋىنشا، كونستيتۋتسيالىق رەفورمالار الەۋمەتتىك سالانىڭ دامۋىنا جاڭا سەرپىن بەرىپ، تۇراقتى جۇمىسپەن قامتۋ كەپىلدىكتەرىن نىعايتۋعا جانە ازاماتتاردىڭ قورعالۋ دەڭگەيىن ارتتىرۋعا باعىتتالعان. ونىڭ سوزىنشە، نەگىزگى زاڭ جوباسىنا ءوندىرىستى قولداۋعا، ەكونوميكالىق ءوسىمدى ىنتالاندىرۋعا جانە ادىلەتتى ءارى ءتيىمدى ساياسي جۇيە قالىپتاستىرۋعا باعىتتالعان ناقتى ءارى تۇراقتى نورمالار ەنگىزىلگەن.
كەزدەسۋ بارىسىندا ەڭبەك ادامىنا قۇرمەت، قىزمەتكەرلەردىڭ قاۋىپسىزدىگى جانە كاسىبي قىزمەتكە قولايلى جاعداي جاساۋ ماسەلەلەرىنە ەرەكشە نازار اۋدارىلدى. قاتىسۋشىلار ۇسىنىلىپ وتىرعان وزگەرىستەر ساياسي جۇيەنى جاڭعىرتىپ، بيلىك تارماقتارىنىڭ تەڭگەرىمدى جۇمىس ىستەۋىن قامتاماسىز ەتەتىنىن جانە ازاماتتاردىڭ مەملەكەتتىك باسقارۋعا قاتىسۋ مۇمكىندىكتەرىن كەڭەيتەتىنىن اتاپ ءوتتى.
پىكىر الماسۋ فورماتىندا «قوستاناي سۋ» قىزمەتكەرلەرى وزدەرىن تولعاندىرعان سۇراقتارىن قويىپ، پىكىرلەرىن ءبىلدىردى. كواليتسيا وكىلدەرى كەرى بايلانىستىڭ ماڭىزدىلىعىن اتاپ ءوتىپ، مۇنداي كەزدەسۋلەر قوعام مەن بيلىك اراسىنداعى سەنىمدى نىعايتۋعا ىقپال ەتەتىنىن جەتكىزدى.
كەزدەسۋ قورىتىندىسىندا وڭىرلىك كواليتسيا مۇشەلەرى كاسىپورىن قىزمەتكەرلەرى ەل بولاشاعىنا قاتىستى ماڭىزدى باستامالاردى قولدايتىنىنا سەنىم ءبىلدىردى.
