فوتو: Zakon.uz
وزبەكستان پرەزيدەنتى شاۆكات ميرزيوەۆ سۋ قويمالارىنىڭ ماڭىندا دەمالىس ايماقتارىن ۇيىمداستىراتىن كاسىپكەرلەرگە سالىقتىق جانە كەدەندىك جەڭىلدىكتەر ەنگىزىلەتىنىن مالىمدەدى. مەملەكەت باسشىسىنىڭ ءباسپاسوز قىزمەتىنىڭ حابارلاۋىنشا، مۇنداي جوبالار ينۆەستيتسيا تارتۋعا، جاڭا جۇمىس ورىندارىن اشۋعا جانە تۋريستەر اعىنىن ارتتىرۋعا مۇمكىندىك بەرەدى، دەپ حابارلايدى “ادىرنا” ۇلتتىق پورتالى Fergana اگەنتتىگىنە سىلتەپ.
سۋ ايدىندارىن پايدالانۋ جولدارى دا تالقىلانعان جيىندا قازىرگى ۋاقىتتا تۋريستىك قىزمەتتەر نەبارى بەس سۋ قويماسىندا كورسەتىلەتىنى ايتىلدى. وسىنداي جوبالاردى تاعى 25 نىساندا جۇزەگە اسىرۋعا بولادى.
وسىعان بايلانىستى بيلىك كاسىپكەرلەردى قولداۋ شارالارىن ەنگىزبەك. اتاپ ايتقاندا، 2029 جىلعى 1 قازانعا دەيىن جەر جانە مۇلىك سالىعىنىڭ مولشەرلەمەلەرى ەكى ەسە تومەندەتىلەدى. سونداي-اق ەلگە GPS جابدىقتارىن، قۇتقارۋ جانە قورعانىس قۇرالدارىن اكەلۋ كەزىندە كەدەندىك تولەمدەردى 120 كۇنگە كەيىنگە قالدىرۋعا نەمەسە ءبولىپ تولەۋگە مۇمكىندىك بەرىلەدى.
سۋ ايدىندارى ماڭىنداعى جەرلەردى ساتۋدان بيۋدجەتكە تۇسەتىن قاراجات سىرتقى ينجەنەرلىك جەلىلەر مەن جول ينفراقۇرىلىمىن دامىتۋعا باعىتتالادى.
دەمالىس ايماقتارىن ۇيىمداستىرۋ كەزىندە قاۋىپسىزدىك تالاپتارىن قاتاڭ ساقتاۋ قاجەتتىگىنە ەرەكشە نازار اۋدارىلدى. تۋريستىك قىزمەتتەردى سەرتيفيكاتتاۋ، كاسىپكەرلەردى كاسىبي قۇتقارۋ قىزمەتتەرىمەن كەلىسىمشارت جاساۋعا مىندەتتەۋ، سونداي-اق باقىلاۋ مۇنارالارى مەن سۋ قويمالارىنىڭ تەرەڭدىگىن كورسەتەتىن بەلگىلەر ورناتۋ ۇسىنىلدى.
ماماندار سۋ ايدىندارى ماڭىندا جەرگىلىكتى حابارلاۋ جۇيەلەرىن، بەينەباقىلاۋدى، سەيسمولوگيالىق جابدىقتاردى جانە تسيفرلىق مونيتورينگ قۇرالدارىن كەڭىنەن قولدانۋ قاجەت دەپ ەسەپتەيدى.
سالالىق ۆەدومستۆولار وكىلدەرىنىڭ ميرزيوەۆكە بايانداۋىنشا، قازىرگى ۋاقىتتا 56 سۋ قويماسىنىڭ تەك تورتەۋىندە عانا تولىققاندى قۇتقارۋ قىزمەتتەرى جۇمىس ىستەيدى. پرەزيدەنت بۇل ولقىلىقتى جويۋدى تاپسىردى.
سونىمەن قاتار قۇتقارۋشى-سۇڭگۋىرلەردى دۋالدى وقىتۋ جۇيەسى ارقىلى دايارلاۋ، تۋريستىك نىساندار قىزمەتكەرلەرىنە توتەنشە جاعداي كەزىندەگى ءىس-قيمىلدار مەن العاشقى مەديتسينالىق كومەك كورسەتۋ بويىنشا كۋرستار ۇيىمداستىرۋ ۇسىنىلدى.
ميرزيوەۆ جۇيەنى جاڭعىرتۋ كەزىندەگى باستى باسىمدىق ادام ءومىرىن ساقتاپ قالۋ ەكەنىن اتاپ ءوتتى. وسىعان بايلانىستى «التىن مينۋت» قاعيداسىن تاجىريبەگە ەنگىزۋ جانە قۇتقارۋشىلاردىڭ توتەنشە جاعداي ورىن العان جەرگە جەتۋ ۋاقىتىن قىسقارتۋ مىندەتى قويىلدى. اتاپ ايتقاندا، قالا ىشىندە بۇل كورسەتكىشتى 5–7 مينۋتقا دەيىن، ال ءىرى ەلدى مەكەندەردەن تىس جەرلەردە 15–20 مينۋتقا دەيىن جەتكىزۋ كوزدەلىپ وتىر.
شەنەۋنىكتەر مەملەكەت باسشىسىنا الداعى كەزەڭگە ارنالعان جوسپارلارىن دا تانىستىردى. اتاپ ايتقاندا، حالقىنىڭ سانى 250 مىڭنان اساتىن قالالار مەن اۋداندارداعى 25 ءورت ءسوندىرۋ-قۇتقارۋ ءبولىمىن زاماناۋي تەحنيكامەن جابدىقتاۋ، كۇردەلى جاعدايلاردا جۇمىس ىستەي الاتىن مامانداندىرىلعان «ماداد» ورتالىعىن قۇرۋ، سونداي-اق اۆياتسيالىق-قۇتقارۋ بولىمشەسى مەن توتەنشە جاعدايلاردى باسقارۋ جونىندەگى عىلىمي-زەرتتەۋ ورتالىعىن اشۋ جوسپارلانعان.
بۇدان بولەك، «112» بىرىڭعاي ديسپەتچەرلىك قىزمەتىنىڭ جۇمىسىن جەتىلدىرۋگە جانە ازاماتتاردىڭ وتىنىشتەرىن وڭدەۋ ۇدەرىسىنە ەرەكشە كوڭىل ءبولىندى. اتاپ ايتقاندا، تسيفرلىق تەحنولوگيالار مەن جاساندى ينتەللەكتىنى كەڭىنەن قولدانۋ قاجەتتىگى اتاپ ءوتىلدى.
