پرەزيدەنتتىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى ارمان قىرىقباەۆ الماتى جاستارىمەن كەزدەسىپ، جاڭا كونستيتۋتسيا جوباسىنىڭ نەگىزگى ەرەجەلەرىن تالقىلادى. ديالوگ اشىق ءارى مازمۇندى ءوتتى. ستۋدەنتتەر، بەلسەندىلەر مەن قوعام وكىلدەرى تاراپىنان كوپتەگەن سۇراق قويىلدى. اسىرەسە، جينالعان قاۋىمدى جاڭا اتا زاڭداعى جاستارعا ارنالعان مۇمكىندىكتەر ەرەكشە قىزىقتىردى.
«جاڭا كونستيتۋتسيا جاستارعا نە بەرەدى؟» دەگەن ساۋال كەزدەسۋ بارىسىندا ەڭ كوپ قويىلعان ءارى تالقىلانعان تاقىرىپتاردىڭ بىرىنە اينالدى. ءاربىر سۇراققا جاۋاپ بەرگەن ارمان قىرىقباەۆ 15 ناۋرىزدا وتەتىن رەسپۋبليكالىق رەفەرەندۋمعا شىعارىلعان جاڭا كونستيتۋتسيا جوباسى تەك زاماناۋي سىن-قاتەرلەرگە جاۋاپ بەرىپ قانا قويماي، ەلدىڭ ۇزاق مەرزىمدى دامۋىنىڭ بەرىك نەگىزىن قالايتىنىن اتاپ ءوتتى. جاڭا اتا زاڭدا ادام قۇقىقتارىنىڭ كەپىلدىكتەرىنە، كاسىپكەرلىكتى قولداۋعا، ساپالى ءبىلىم بەرۋدى قامتاماسىز ەتۋگە جانە عىلىم مەن يننوۆاتسيانى دامىتۋعا ايرىقشا ءمان بەرىلگەن.
پرەزيدەنت كومەكشىسىنىڭ ايتۋىنشا، جاڭا كونستيتۋتسيا باسەكەگە قابىلەتتى، ءبىلىمدى ءارى تەحنولوگيالىق تۇرعىدان ساۋاتتى ۇرپاق ءوسىرۋ ءۇشىن قۇقىقتىق نەگىز قالىپتاستىرادى. ول جاس عالىمدار مەن ستارتاپ-جوبالارعا قولداۋ كورسەتۋدى كۇشەيتۋ مەملەكەتتىڭ ستراتەگيالىق باسىمدىقتارىنىڭ ءبىرى ەكەنىن جەتكىزدى.
سونىمەن قاتار، كەزدەسۋ بارىسىندا جاڭا كونستيتۋتسيا جوباسىندا كورىنىس تاپقان پرەزيدەنتتىڭ «ادىلەتتى قازاقستان»، «تازا قازاقستان» جانە «زاڭ مەن ءتارتىپ» باستامالارىنا ايرىقشا كوڭىل ءبولىندى.
«زاڭ مەن ءتارتىپ» قاعيداتى، قورشاعان ورتاعا ۇقىپتى قاراۋ، «ادىلەتتى قازاقستان» يدەياسى – پرەزيدەنتتىڭ جىل سايىنعى حالىققا جولداۋلارىندا، ماقالالارى مەن سوزدەرىندە ۇنەمى ايتىلىپ كەلەدى. كوپ جاعدايدا ولار جاستارعا ارنالادى. جاڭا كونستيتۋتسيا ءماتىنىن ازىرلەۋ بارىسىندا 10 مىڭنان استام ۇسىنىس ءتۇستى. ولاردىڭ باسىم بولىگى ادامعا باعدارلانعان قۇندىلىقتارعا ارنالدى – ادىلەتتىلىكتىڭ سالتانات قۇرۋى، زاڭ مەن ءتارتىپتىڭ ۇستەمدىگى، قالالارىمىز بەن اۋىلدارىمىزدىڭ تازالىعى، جاسامپاز ءارى ىزگى نيەتتەر. دەمەك، مەملەكەت باسشىسى حالىقتىڭ جۇرەگىندە كوپتەن بەرى جۇرگەن دۇنيەلەردى قوزعاپ ءجۇر. سوندىقتان بۇل يدەيالاردىڭ جاڭا كونستيتۋتسيا ماتىنىندە كورىنىس تابۋى – زاڭدى قۇبىلىس»، – دەپ تۇيىندەدى ول.
