پاكىستان 27 اقپانعا قاراعان ءتۇنى اۋعانستاننىڭ بىرنەشە قالاسىنا شابۋىل جاسادى، دەپ حابارلايدى "ادىرنا" ۇلتتىق پورتالى.
ونىڭ ىشىندە ەل استاناسى كابۋلعا اۋەدەن جانە جەردەن اسكەري سوققى جاسالدى.
شابۋىلدار تالىپتەردىڭ شەكارا بويىنداعى بەكىنىستەرىنە، شتاب-پاتەرلەرىنە جانە وق-ءدارى قويمالارىنا باعىتتالعان. سونىمەن قاتار، پاكىستان اسكەري ۇشاقتارى كانداگار پروۆينتسياسىنداعى اسكەري بازاعا دا سوققى جاسادى.
پاكىستاننىڭ قورعانىس ءمينيسترى حودجا اسيف بۇل ارەكەتتى اۋعان كۇشتەرىنىڭ شەكاراداعى شابۋىلدارىنا جاۋاپ رەتىندە ءماجبۇرلى ارەكەت دەپ اتادى.
«پاكىستان وتكەندە اۋعان حالقىنا قولداۋ كورسەتكەن. 50 جىل ىشىندە بەس ميلليون اۋعاندىقتى قابىلدادىق. بىراق شىدامىمىز تاۋسىلدى. ەندى اشىق سوعىس باستالدى» – دەدى ول.
يسلامابادتىڭ مالىمەتىنشە، شابۋىلدار ناتيجەسىندە 133 اۋعان سودىرى جويىلىپ، توعىز تالىپتىك پوزيتسيا باسىپ الىندى، 27 پوزيتسيا تولىق جويىلدى.
اۋعانستان ۇكىمەتىنىڭ ءباسپاسوز حاتشىسى زابيحۋللا مۋدجاحيد پاكىستاننىڭ سوڭعى شابۋىلدارىنا جاۋاپ رەتىندە كانداگار مەن گەلماندتاعى پاكىستان اسكەري بازالارىنا سوققى باستاعانىن حابارلادى. قاقتىعىس سالدارىنان 10 پاكىستاندىق سارباز قازا تاۋىپ، 13 بەكىنىس باسىپ الىندى.
كابۋل تاراپىنان بۇل شابۋىلدار پاكىستاننىڭ شەكاراداعى اۋعان پوزيتسيالارىنا جاساعان سوڭعى ارەكەتتەرىنە جاۋاپ رەتىندە باعالانىپ وتىر.
پاكىستان مەن اۋعانستان اراسىنداعى 2 611 شاقىرىمعا سوزىلعان ورتاق شەكاراداعى قاتىناستار قازان ايىندا ەكى تاراپتان 70-تەن استام ادامنىڭ قازا بولۋى ناتيجەسىندە كۇرت ناشارلاعان. يسلاماباد كابۋلدى اۋعان تەرريتورياسىندا قارۋلى توپتاردىڭ پاكىستانعا شابۋىل دايىنداۋىنا رۇقسات بەرگەنى ءۇشىن ايىپتادى.
