اۋعانستاندا ەكى كۇننەن سوڭ ينتەرنەت پەن تەلەكوممۋنيكاتسيا قىزمەتتەرى قالپىنا كەلگەن. تۇرعىندار جەلىگە قايتا ورالعاندارىن كوشەگە شىعىپ تويلاعان. بۇل تۋرالى BBC جازدى، دەپ حابارلايدى “ادىرنا”.
Netblocks ينتەرنەت-مونيتورلاۋ قىزمەتىنىڭ حابارلاۋىنشا، ەلدەگى بايلانىس ء«ىشىنارا» قالپىنا كەلە باستاعان.
بايلانىستىڭ 48 ساعاتقا ءۇزىلۋى اسەرىنەن ەلدە كاسىپورىنداردىڭ جۇمىسى مەن اۋە قاتىناسى بۇزىلىپ، شۇعىل قىزمەتتەرگە حابارلاسۋ مۇمكىن بولماعان.
«بارلىعى باقىتتى، ۇيالى تەلەفوندارىن ۇستاپ، تۋىستارىمەن سويلەسۋدە. ايەلدەردەن باستاپ، تالىپتەرگە دەيىن بايلانىس قالپىنا كەلگەندە تەلەفون قولدانا باستادى. قازىر قالادا ادام كوپ»، – دەيدى كابۋلدا سۇحبات بەرگەن ادامداردىڭ ءبىرى.
نەگىزىنەن، تاليبان ۇكىمەتى ينتەرنەتتىڭ سونۋىنە قاتىستى رەسمي تۇسىنىكتەمە بەرمەدى. بىراق، وتكەن ايدا تاليبان گۋبەرناتورىنىڭ سولتۇستىك بالح پروۆينتسياسىنداعى وكىلى ينتەرنەتكە كىرۋ "ازعىندىقتىڭ الدىن الۋ ءۇشىن" بۇعاتتالىپ جاتقانىن ايتتى.
تۇرعىندار ينتەرنەت سونگەن كەزدە كابۋلدىڭ ورتالىعىندا مۇلگىگەن تىنىشتىق ورناعانىن، بانكتەر جابىلىپ، ساۋدا ورتالىقتارىنىڭ قاڭىراپ قالعانىن ايتۋدا. ءتىپتى، اقشا ايىرباستاۋ نارىعىنداعى بارلىق حالىقارالىق اۋدارىم ساپ تىيىلعان.
