23 اقپان كۇنى اقتاۋ قالاسىنداعى «حالىق ارەنا» سپورت كەشەنىندە جاڭا كونستيتۋتسيانى قولداۋعا ارنالعان فورۋم ءوتتى. اۋقىمدى ءىس-شاراعا شامامەن 4000 ادام – قوعام وكىلدەرى، ءماسليحات دەپۋتاتتارى، قوعامدىق بىرلەستىكتەردىڭ مۇشەلەرى، جاستار جانە ءوڭىر تۇرعىندارى قاتىستى.
فورۋمنىڭ حەدلاينەرى – «مۋزارت» توبى. ولار تانىمال اندەرىن ورىنداپ، زالداعى ءار بۋىن وكىلدەرىن بىرىكتىرىپ، بىرلىك پەن پاتريوتتىق رۋحقا تولى ەرەكشە اتموسفەرا جاسادى.
ءىس-شارا كونستيتۋتسيالىق رەفورمالار، قوعامدىق دامۋ جانە ازاماتتىق جاۋاپكەرشىلىك ماسەلەلەرىنە ارنالدى.
قازاقستان رەسپۋبليكاسىنىڭ كونستيتۋتسيالىق رەفورما جونىندەگى كوميسسياسىنىڭ مۇشەسى، ماڭعىستاۋ وبلىستىق ءماسليحاتىنىڭ توراعاسى جاڭبىرباي ماتاەۆ قاتىسۋشىلار الدىندا ءسوز سويلەپ، قازاقستاننىڭ بولاشاعى قوعامنىڭ بەلسەندى ازاماتتىق ۇستانىمىنا جانە جاستاردىڭ مەملەكەتتى دامىتۋداعى رولىنە تىكەلەي بايلانىستى ەكەنىن اتاپ ءوتتى.
«جاستار – ەلدىڭ قوزعاۋشى كۇشى ءارى ستراتەگيالىق رەسۋرسى. بولاشاقتا قۋاتتى، ادىلەتتى ءارى وركەندەگەن قازاقستاندى قۇرۋ – سىزدەردىڭ قولدارىڭىزدا. كونستيتۋتسيالىق رەفورمالار ازاماتتاردىڭ قۇقىقتارى مەن مۇمكىندىكتەرىن نىعايتۋعا باعىتتالعان، ال رەفەرەندۋمعا قاتىسۋ – ازاماتتىق جاۋاپكەرشىلىكتىڭ ماڭىزدى كورىنىسى»، – دەپ اتاپ ءوتتى جاڭبىرباي ماتاەۆ.
سونداي-اق ماڭعىستاۋ وبلىستىق ءماسليحاتىنىڭ دەپۋتاتى، ۇلتتىق قۇرىلتاي مۇشەسى ۋايس ەرسايىنۇلى ازاماتتاردىڭ قوعامدىق-ساياسي ۇدەرىستەرگە قاتىسۋى مەن قوعام بىرلىگىنىڭ ماڭىزدىلىعىن اتاپ ءوتتى.
جاستاردىڭ ءرولى ەرەكشە اتاپ ءوتىلدى: اقتاۋ قالاسىنداعى مەكتەپ-گيمنازياسىنىڭ پەداگوگى مادينا اليەۆا جانە Yessenov University ستۋدەنتى، بولاشاق زاڭگەر بەكزات قادىرباەۆ جاڭا كونستيتۋتسيانىڭ ماڭىزى مەن ازاماتتىق بەلسەندىلىك تۋرالى ويلارىن ءبولىستى. قاتىسۋشىلار اتا زاڭنىڭ تەڭ قۇقىقتاردى، ءبىلىم الۋ مەن كاسىبي دامۋعا جانە ەل ومىرىنە قاتىسۋعا كەڭ مۇمكىندىكتەر بەرەتىنىن اتاپ ءوتتى.
فورۋم م. وسكىنباەۆ اتىنداعى ماڭعىستاۋ وبلىستىق فيلارمونياسىنىڭ ونەرپازدارىنىڭ كونتسەرتىمەن جالعاستى. اتاپ ايتقاندا، ايدا بايگەلوۆا، اسقار كوشەروۆ، ءاسانالى كوشەروۆ، نار-ۇلت توبى، اقمارال ارعىنقىزى جانە وزگە دە ونەرپازدار ونەر كورسەتتى. كەشتىڭ ەڭ اسەرلى ءساتىنىڭ ءبىرى – زالداعى كورەرمەندەرمەن بىرگە ورىندالعان ء«وز ەلىم» ءانى بولدى.
فورۋم قاتىسۋشىلارى جاڭا كونستيتۋتسيانى تولىق قولداپ، ءاربىر ازاماتتىڭ ەل تاعدىرىنا ۇلەس قوسۋ ماڭىزدىلىعىن اتاپ ءوتتى. ءىس-شارا بىرلىك، ۇيىمشىلدىق جانە ەل بولاشاعىنا ورتاق جاۋاپكەرشىلىك رۋحىندا ءوتتى.
ماڭعىستاۋدا وتكەن فورۋم قوعامنىڭ جوعارى دەڭگەيدەگى بىرلىگىن كورسەتىپ، قازاقستان رەسپۋبليكاسىن ءارى قاراي دامىتۋعا باعىتتالعان باستامالاردى قولداۋدى ايقىن كورسەتتى.
