اقمولا وبلىسىنداعى كارەردە جۇرگىزۋشى ەكسكاۆاتورمەن بىرگە سۋعا باتىپ كەتتى، دەپ حابارلايدى “ادىرنا”.
اقمولا وبلىسى پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، اعىمداعى جىلدىڭ 20 اقپانىندا ساعات 12:40 شاماسىندا اقمولا وبلىسى تسەلينوگراد اۋدانىنىڭ پوليتسيا بولىمىنە قابانباي باتىر اۋىلى ماڭىندا بولعان وقيعا تۋرالى حابارلاما تۇسكەن.
«الدىن الا مالىمەت بويىنشا، ساز وندىرەتىن كارەردەگى سۋ ايدىنىندا ەكسكاۆاتور باتىپ كەتكەن. كابينا ىشىندە 1996 جىلى تۋعان جۇرگىزۋشى بولعان. قازىرگى ۋاقىتتا وقيعا ورنىندا پوليتسيا قىزمەتكەرلەرى مەن جەدەل قىزمەت وكىلدەرى جۇمىس ىستەۋدە. تەحنيكانى سۋ ايدىنىنان شىعارۋ شارالارى جۇرگىزىلۋدە. وقيعانىڭ ءمان-جايى مەن سەبەپتەرى انىقتالۋدا»، – دەپ حابارلادى ۆەدومستۆو.
پوليتسيا وكىلدەرى تەكسەرۋ ناتيجەسىنە سايكەس قولدانىستاعى زاڭناماعا ساي پروتسەسسۋالدىق شەشىم قابىلداناتىنىن اتاپ ءوتتى. قوسىمشا اقپارات الداعى ۋاقىتتا جاريالانادى.
