اقوردا پرەزيدەنت قاسىم-جومارت توقاەۆتىڭ 7 ترلن تەڭگە كولەمىندەگى قاراجاتتىڭ «اۋدارىلۋى» تۋرالى مالىمدەمەسىنىڭ راس ەكەنىن راستادى. بۇل تۋرالى پرەزيدەنتتىڭ كەڭەسشىسى – ءباسپاسوز حاتشىسى ايبەك سمادياروۆ قازتاگ اگەنتتىگىنە مالىمدەدى، دەپ حابارلايدى “ادىرنا”.
سمادياروۆتىڭ ايتۋىنشا، مەملەكەت باسشىسى جالعان اقپارات تاراتپايدى.
“ەگەر ول 7 ترلن تەڭگە كولەمىندە ترانزاكتسيالار (قاراجات اۋدارۋ) بولعانىن ايتسا، دەمەك، سولاي بولعان. نەگىزى بۇل اقپارات قارجىلىق مونيتورينگ اگەنتتىگىندە وتكەن كەڭەسكە قاتىسۋشىلارعا ارنالعان بولاتىن. مۇنى جالپى جۇرتشىلىقتىڭ تالقىلاۋىنا سالۋ ويىندا بولماعان. ياعني، تەك قىزمەتتىك سيپاتتا ايتىلدى دەگەن دۇرىس. ال ترانزاكتسيالاردى وتكىزگەن بانك اڭگىمەنىڭ قاي بانك جايىندا ەكەنىن ءبىلىپ وتىر. پرەزيدەنت ساياسي ماقسات پەن ديپلوماتيالىق پروتوكول تالاپتارىن ەسكەرە وتىرىپ، ترانزاكتسيالىق قاراجاتتىڭ قاي ەلدەن شىققانىن، ونىڭ قانداي مەملەكەتكە كەتكەنىن، سونداي-اق سانكتسيالىق رەجيم بەلەڭ الىپ تۇرعان جاعدايدا وسىنداي ارەكەتكە بارعان قاي بانك ەكەنىن دە ادەيى ايتپادى»، - دەدى ول.
بۇعان دەيىن ۇلتتىق بانك توراعاسىنىڭ ورىنباسارى بەرىك شولپانقۇلوۆ توقاەۆتىڭ مالىمدەمەسىنە كۇمان كەلتىرىپ، قۇقىقبۇزۋشىلىقتار انىقتالماعانىن ايتقان ەدى. وسى جاعداي قوعامدا جالعان اقپارات ءۇشىن جاۋاپكەرشىلىك ماسەلەسىنە قاتىستى پىكىرتالاستى كۇشەدى.
سونداي-اق، بۇگىن مەملەكەت باسشىسىنىڭ وكىمىمەن بەرىك شولپانقۇلوۆ بەرگەن وتىنىشىنە سايكەس قازاقستان رەسپۋبليكاسى ۇلتتىق بانكى توراعاسىنىڭ ورىنباسارى لاۋازىمىنان بوساتىلدى.
ەسكە سالا كەتەيىك، 28 قاڭتاردا قارجىلىق مونيتورينگ اگەنتتىگىندە وتكەن كەڭەستە توقاەۆ اگەنتتىك توراعاسى جانات ەليمانوۆتىڭ بايانداماسىنا سىلتەمە جاساپ، 2025 جىلى ىرگەلەس مەملەكەتتەن قازاقستاندىق بانكتەردىڭ ءبىرى ارقىلى شەتەلگە 7 ترلن تەڭگەدەن استام قاراجات اۋدارىلعانىن مالىمدەگەن. وسىعان بايلانىستى ءتيىستى ورگاندارعا ناقتى تاپسىرمالار بەرىلگەن.
29 قاڭتاردا بىرقاتار بانكتەر بۇل سحەماعا قاتىسى جوق ەكەنىن ايتتى. كەيىن مۇنداي مالىمدەمە جاساعان قارجى ۇيىمدارىنىڭ سانى ارتتى. 31 قاڭتاردا تەكسەرۋ باستالعانى بەلگىلى بولدى، الايدا ناقتى بانك اتاۋى جاريالانعان جوق.
3 اقپاندا قازتاگ ساۋال جولداعان بانكتەردىڭ باسىم بولىگى اتالعان وپەراتسيالارعا قاتىسى بارىن جوققا شىعاردى. 4 اقپاندا ءماجىلىس دەپۋتاتى ازات پەرۋاشەۆ 7 ترلن تەڭگە اۋدارىمىنا قاتىستى اقپاراتتىڭ اشىق كوزدەردەن الىنىپ تاستالعانىن ايتىپ، دەپۋتاتتار ءالى دە ناقتى ءتۇسىندىرۋ كۇتەتىنىن مالىمدەگەن ەدى.
