قازاقستاندىق مانەرلەپ سىرعاناۋشى ميحايل شايدوروۆ وڭتۇستىك كورەيانىڭ سەۋل قالاسىندا وتكەن مانەرلەپ سىرعاناۋدان ءتورت قۇرلىق چەمپيوناتىندا التىن مەدال جەڭىپ الدى، دەپ حابارلايدى "ادىرنا" ۇلتتىق پورتالى.
ميحايل قىسقا جانە ەركىن باعدارلامادا ۇزدىك ناتيجە كورسەتىپ، ءوز مانسابىنداعى رەكوردتىق 285.10 ۇپاي جينادى. ول قىسقا باعدارلامادا 94.73 ۇپاي، ال ەركىن باعدارلامادا 190.37 ۇپاي ەنشىلەدى.
جارىستىڭ كۇمىس جۇلدەسىن وڭتۇستىك كورەيا سپورتشىسى جۋنحۆان چا (265.02 ۇپاي) يەلەنسە، امەريكالىق جيمما ما (245.01 ۇپاي) قولا جۇلدەگە قول جەتكىزدى.
قازاقستاندىق تاعى ءبىر سپورتشى دياس جيرەنباەۆ بۇل جارىستى 19-ورىنمەن اياقتاپ، 166.34 ۇپاي جينادى.
ايتا كەتەيىك، ءدال وسى چەمپيوناتتا 10 جىل بۇرىن قازاقستاندىق مانەرلەپ سىرعاناۋشى دەنيس تەن توپ جارعان ەدى. ميحايل شايدوروۆ داڭقتى سپورتشىنىڭ جەتىستىگىن قايتالاپ، قازاقستانعا تاريحي جەڭىس سىيلادى.
