مارات جىلانباەۆتىڭ قىزى كومەك سۇراپ، ۆيدەوۇندەۋ جولدادى

مارافونشى، تىركەلمەگەن ساياسي «العا، قازاقستان» پارتياسىنىڭ ليدەرى مارات جىلانباەۆتىڭ قىزى كومەك سۇرادى. بۇل تۋرالى ول الەۋمەتتىك جەلىگە ۆيدەو جاريالادى، دەپ حابارلايدى "ادىرنا".

مارات جىلانباەۆقا ادۆوكاتتارى جانە وتباسىمەن كەزدەسۋگە رۇقسات بەرمەي جاتىر. تەلەفون سوعۋعا دا تىيىم سالىنعان. انەل جىلانباەۆانىڭ سوزىنشە، ستەپنوگورسكتەگى №4 تۇرمەگە جاڭا باسشى قۋانىش مەدەەۆ تاعايىندالعالى بەلسەندىگە قىسىم كۇشەيگەن.

قازىر مارات جىلانباەۆتىڭ ءحال-جاعدايى بەلگىسىز. ول نارازىلىق رەتىندە قاڭتاردىڭ 4-ءى اشتىق جاريالاعان. سودان بەرى 45 كۇننەن استى. وتباسى بەلسەندىنىڭ جاعدايى الاڭداۋلى. ادۆوكاتتارى قاڭتاردان بەرى كىرە الماي كەلەدى.

«قازىر اكەمنىڭ جاعدايى وتە اۋىر. ونىڭ امان-ەسەن بولعانىن قالايمىن. ادامداردىڭ بىزگە كومەكتەسەتىنىنە جانە ادىلدىك ورنايتىنىنا سەنەمىن. كومەكتەسىڭىزدەرشى، - دەدى انەل جىلانباەۆا.

بۇعان دەيىن بەلسەندى جاقىندارىنا جاڭا تۇرمە باستىعى مەدەەۆتىڭ قوقان-لوققى جاساعانىن ايتقان. ول مارات جىلانباەۆقا «قاتاڭ قاۋىپسىزدىك كامەراسىنا اۋىستىرىپ، جازا مەرزىمىن ۇزارتامىن» دەگەن.

ەسكە سالساق، مارات جىلانباەۆ – الەمنىڭ ەڭ ءىرى شولدەرىن جۇگىرىپ وتكەن الەمدەگى جالعىز مارافونشى، 7 مارتە الەمدىك رەكورد ورناتىپ گيننەس كىتابىنا ەنگەن. ونىڭ رەكوردىنان ءالى ەشكىم اسا المادى. بيلىكتى اشىق سىناپ، شەرۋلەرگە قاتىسقانى ءۇشىن ساياسي قۋدالاۋعا ۇشىراپ، 7 جىلعا سوتتالدى.