اقمولا وبلىسى اتباسار قالاسىنداعى كولونيادا وتىرعان ازاماتتىق بەلسەندى تيمۋر دانەباەۆتى ازاپتاپ، ۆيدەوسىن جەلىگە تاراتقان كولونيانىڭ بۇرىنعى قىزمەتكەرلەرى توقاەۆتان كومەك سۇراپ، ۆيدەو جولدادى.
6 قىركۇيەكتە قازاقستان قىلمىستىق-اتقارۋ جۇيەسى كوميتەتى (قاجك) تيمۋر دانەباەۆتى ازاپتاۋ وقيعاسىنا قاتىستى 11 قىزمەتكەردى جۇمىسىنان بوساتقانىن حابارلادى.
"جۇرگىزىلگەن قىزمەتتىك تەرگەۋ ناتيجەلەرى بويىنشا ءتارتىپ كوميسسياسىنىڭ شەشىمىمەن وبلىستىق قىلمىستىق-اتقارۋ جۇيەسى دەپارتامەنتىنىڭ باستىعى جانە ونىڭ ورىنباسارى، سونداي-اق كولونيا باستىعى اتقاراتىن لاۋازىمدارىنان شەتتەتۋگە ۇسىنىلدى. سونىمەن قاتار، قۇقىق بۇزۋشىلىققا قاتىسى بار 11 قىزمەتكەر ىشكى ىستەر ورگاندارىنان تەرىس سەبەپتەرمەن جۇمىستان شىعارۋعا ۇسىنىلدى" دەپ جازىلعان حابارلامادا.
دەگەنمەن، قىزمەتىنەن بوساعاندار توقاەۆتان كومەك سۇراۋدا.
ايتا كەتەيىك، 3 قىركۇيەكتە اقمولا وبلىسىنداعى اتباساردا كولونيا قىزمەتكەرلەرى اجەتحانا جۋدان باس تارتقان بەلسەندى تيمۋر دانەباەۆتى ۇرىپ-سوعىپ، قيناعان ۆيدەوسى تارادى. ۆيدەودا كولونيا قىزمەتكەرى كۇش قولدانۋعا ارنايى قۇرال قولدانۋعا بۇيرىق بەرەدى. وندا دانەباەۆتى جەرگە جاتقىزىپ، قول-اياعىن ۇستاپ، دۋبينكامەن ۇرعانى كورىنەدى.
ەسكە سالايىق، 38 جاستاعى تيمۋر دانەباەۆ 2022 جىلى قازاقستان پرەزيدەنتى قاسىم-جومارت توقاەۆتى قاڭتار وقيعاسى كەزىندە "ەلىمىزگە 20 مىڭ تەرروريست شابۋىل جاسادى" دەگەن ءسوزى ءۇشىن جاۋاپقا تارتۋعا تالپىنعان ازاماتتىق بەلسەندى رەتىندە تانىلعان.
بيىل 15 ماۋسىمدا استانا سوتى تيمۋر دانەباەۆتى "ۇلتارالىق ارازدىق قوزدىردى" (174-باپتىڭ 1-بولىگى) دەپ ايىپتاپ، ءۇش جىلعا بوستاندىعىنان ايىرعان. 1 تامىزدا اپەللياتسيا سوتى ۇكىمدى كۇشىندە قالدىردى. بەلسەندىنىڭ ادۆوكاتى ءلاززات تەمىرجانوۆا پروتسەستى جۇرگىزۋ ءتارتىبى بۇزىلعانى تۋرالى كەلتىرگەن ۋاجدەرىن سوت قابىلداماي تاستاعانىن ايتقان ەدى.
