فوتو:Reuters
ۇلىبريتانيادا كورول وتباسىنىڭ بۇرىنعى مۇشەسى، يورك گەرتسوگى اتانعان ەندريۋ ماۋنتباتتەن-ۆيندزور قاماۋعا الىندى. بۇل تۋرالى BBC جازدى، دەپ حابارلايدى “ادىرنا”.
تەرگەۋ «ەپشتەين فايلدارى» دەپ اتالاتىن جاڭا ماتەريالدارعا بايلانىستى جۇرگىزىلۋدە.
بريتاندىق The Telegraph گازەتىنىڭ مالىمەتىنشە، ۇستاۋ شاراسى تاڭەرتەڭ ەرتە نورفولك ايماعىنداعى Wood Farm كوتتەدجىندە وتكەن. سوڭعى اپتالاردا ەندريۋ ءدال وسى جەردە تۇرعان.
ساعات تاڭعى سەگىز شاماسىندا ۇيگە ازاماتتىق كيىمدەگى پوليتسيا قىزمەتكەرلەرى كەلگەن. وپەراتسيا شامامەن جارتى ساعاتقا سوزىلعان. كەيىن كورتەج اۋماقتان كەتكەن.
Thames Valley Police شامامەن 60 جاستاعى ەر ادامنىڭ ۇستالعانىن جانە ونىڭ قاماۋدا وتىرعانىن راستادى. سونىمەن قاتار بەركشير گرافتىعىنداعى تاعى ءبىر مەكەنجايدا، سونىڭ ىشىندە Royal Lodge اۋماعىندا ءتىنتۋ جۇرگىزىلگەنى حابارلاندى.
پوليتسيا مالىمەتىنشە، ەر ادام «قىزمەتتىك وكىلەتتىگىن تەرىس پايدالانۋ» كۇدىگى بويىنشا ۇستالعان. تەرگەۋ جالعاسۋدا.
تەرگەۋ ەندريۋدىڭ ۇلىبريتانيانىڭ ارنايى ساۋدا وكىلى قىزمەتىن اتقارعان كەزەڭىنە قاتىستى جۇرگىزىلۋدە. قۇقىق قورعاۋ ورگاندارى «ەپشتەين فايلدارىنداعى» جاڭا دەرەكتەردى تەكسەرىپ جاتىر. اتاپ ايتقاندا، امەريكالىق قارجىگەر دجەففري ەپشتەينگە قۇپيا اقپارات بەرىلگەن بولۋى مۇمكىن دەگەن جايت قاراستىرىلۋدا.
ەندريۋ وزىنە تاعىلعان بارلىق ايىپتاۋلاردى جوققا شىعارىپ وتىر.
ىسكە بىرنەشە پوليتسيا باسقارماسى مەن ۇلتتىق قىلمىسپەن كۇرەس اگەنتتىگى تارتىلعان. سونىمەن قاتار لوندون پوليتسياسى بۇرىن ەندريۋمەن جۇمىس ىستەگەن كورولدىك كۇزەت قىزمەتكەرلەرىنە قاتىستى پروتسەدۋرالىق تالاپتاردىڭ ساقتالۋىن تەكسەرۋدە.
ۇلىبريتانيا پرەمەر-ءمينيسترى كير ستارمەر BBC Breakfast ەفيرىندە زاڭ الدىندا ءبارى تەڭ ەكەنىن اتاپ ءوتتى. ونىڭ ايتۋىنشا، كىمگە قاتىستى تەرگەۋ جۇرگىزىلسە دە، بارلىق ازامات زاڭ تالاپتارىنا باعىنۋعا مىندەتتى.
ەندريۋدىڭ اتى دجەففري ەپشتەين ىسىنە بايلانىستى بىرنەشە جىل بويى اتالىپ كەلەدى. 2019 جىلى ول كورولدىك وتباسى مۇشەسى رەتىندەگى قوعامدىق مىندەتتەرىن توقتاتتى. كەيىن ول ازاماتتىق تالاپ-ارىزدى سوتتان تىس كەلىسىم ارقىلى رەتتەگەن.
2022 جىلى مارقۇم پاتشايىم ءىى ەليزاۆەتا ونى بىرقاتار كورولدىك مىندەتتەرىنەن ايىرعان بولاتىن. ال 2025 جىلدىڭ قازانىندا ءىىى چارلز ءىنىسىن حانزادا تيتۋلىنان ءبىرجولا ايىرعانى حابارلانعان.
ەندريۋ ماۋنتباتتەن-ۆيندزور — ءىى ەليزاۆەتا مەن حانزادا ءفيليپپتىڭ كىشى ۇلى، ءىىى ءچارلزدىڭ ءىنىسى. ول 20 جىلدان استام كورولدىك فلوتتا قىزمەت ەتىپ، فولكلەند سوعىسىنا قاتىسقان. 1986–2025 جىلدارى يورك گەرتسوگى تيتۋلىن يەلەنىپ، بريتان تاعىنىڭ مۇراگەرلىك تىزىمىندە سەگىزىنشى ورىندا بولعان.
قازىرگى ۋاقىتتا تەرگەۋ جالعاسىپ جاتىر. رەسمي ايىپ تاعۋ ماسەلەسى قوسىمشا تەكسەرۋلەر ناتيجەسىنە بايلانىستى شەشىلەدى.
