قىرعىزستاندا بۇرىنعى پرەزيدەنت المازبەك اتامباەۆتىڭ ۇلى مەن بىرنەشە ەكس-دەپۋتات قاماۋعا الىندى، دەپ حابارلايدى «ادىرنا ءتىلشىسى 24.kg اگەنتتىگىنە سىلتەمە جاساپ.
ولارعا قاتىستى جاپپاي تارتىپسىزدىك ۇيىمداستىرۋ بويىنشا قىلمىستىق ءىس قوزعالعان.
«ىشكى ىستەر مينيسترلىگى جوگوركۋ كەنەش سايلاۋىنان كەيىن جاپپاي تارتىپسىزدىك ۇيىمداستىرۋدى جوسپارلاعان دەسترۋكتيۆتى توپتىڭ ارەكەتىن توقتاتتى. ونىڭ قۇرامىندا ساياسي تۇلعالار، ەكس-دەپۋتاتتار، بۇرىنعى مەملەكەتتىك قىزمەتكەرلەر مەن كۇش قۇرىلىمدارىنىڭ قىزمەتكەرلەرى بولعان. ولار ءوز جاقتاستارىن، ونىڭ ىشىندە قىلمىستىق توپتار مەن سپورتتىق قاۋىمداستىق وكىلدەرىن تارتىپ، ارانداتۋشىلىق پەن كۇش قولدانۋعا باعىتتالعان قاقتىعىستار ۇيىمداستىرماق بولعان»،- دەلىنگەن حابارلامادا.
قاماۋعا الىنعانداردىڭ قاتارىندا قادىربەك اتامباەۆ، سونداي-اق بۇرىنعى دەپۋتاتتار ەرمەك ەرماتوۆ، قادىربەك اتامباەۆ، قۋانىشبەك كادىروۆ جانە كاسىپكەر ۋرمات بارىقتاباسوۆ بار. ولاردىڭ بارلىعى 17 قاڭتارعا دەيىن تەرگەۋ يزولياتورىندا بولادى.
كەيىنىرەك قادىربەك اتامباەۆ وزىنە قاتىستى ءىستىڭ نەعۇرلىم اۋىر باپقا اۋىستىرىلعانىن حابارلادى. وعان بيلىكتى كۇشپەن باسىپ الۋعا ارەكەت جاسادى دەگەن ايىپ تاعىلعان.
ەسكە سالا كەتەيىك، بۇعان دەيىن قىرعىزستان ءىىم جوگوركۋ كەنەش سايلاۋىنان كەيىن جاپپاي تارتىپسىزدىك ۇيىمداستىرۋدى جوسپارلاعان دەسترۋكتيۆتى توپ مۇشەلەرىنىڭ ۇستالعانىن مالىمدەگەن بولاتىن.
تاعى ءبىر پرەزيدەنت قامالدى. كەڭسەسىنە بەكىنگەن وڭتۇستىك كورەيا باسشىسى "بۇلىك جاسادى" دەپ ايىپتالدى
