مەملەكەت باسشىسى قاسىم-جومارت توقاەۆ قىرعىزستان پرەزيدەنتى سادىر جاپاروۆپەن تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى اقورداعا سىلتەپ.
ەكى ەل باسشىسى تەلەفون ارقىلى قازاق-قىرعىز قاتىناسىنا باعا بەردى.
«قازاقستان پرەزيدەنتى قازاق-قىرعىز قاتىناستارىنىڭ وڭ ديناميكاسىن اتاپ ءوتتى. بۇل تۇراقتى ساياسي ديالوگ، ۇكىمەتتەر مەن ىسكەرلىك ورتا اراسىنداعى بەلسەندى ءوزارا ارەكەتتەسۋ ارقىلى قامتاماسىز ەتىلىپ وتىر. ەكى باۋىرلاس ەلدىڭ باسشىلارى ساۋدا-ەكونوميكالىق، كولىك-لوگيستيكا جانە سۋ-ەنەرگەتيكا سالالارىنداعى ىنتىماقتاستىقتىڭ جوعارى دەڭگەيىنە قاناعاتتانۋشىلىق ءبىلدىردى»، - دەلىنگەن رەسمي حابارلامادا.
قازاقستان پرەزيدەنتى سادىر جاپاروۆتىڭ قوعام بىرلىگىن ساقتاۋعا جانە قىرعىز مەملەكەتتىلىگىن نىعايتۋعا باعىتتالعان شەشىمدەرىن قولداۋ ءبىلدىردى.
سونداي-اق، مەملەكەت باسشىسى قىرعىزستان پرەزيدەنتىن قازاقستانداعى كونستيتۋتسيالىق رەفورما تۋرالى حاباردار ەتىپ، ونىڭ ەلدىڭ تۇراقتى دامۋىنا باعىتتالعانىن جەتكىزدى.
«سويلەسۋشىلەر وڭىرلىك ىنتىماقتاستىققا قاتىستى بارلىق ماسەلەلەر بويىنشا ءبىر اۋىزدان پىكىر ءبىلدىردى. قاسىم-جومارت توقاەۆ بىشكەكتە وتەتىن شىۇ ءسامميتى مەن دۇنيەجۇزىلىك كوشپەندىلەر ويىندارى سياقتى ماڭىزدى حالىقارالىق شارالاردى ءساتتى وتكىزۋگە تىلەكتەستىك ءبىلدىردى. قازاقستان پرەزيدەنتى سونداي-اق قىرعىزستان قوعامىنىڭ بىرلىگىن ساقتاۋ جانە مەملەكەتتىك قۇرىلىمدى نىعايتۋعا باعىتتالعان سادىر جاپاروۆتىڭ شەشىمدەرىن قولداعانىن جەتكىزدى»، – دەپ حابارلادى اقوردا.
قىرعىزستان باسشىسى سوڭعى كۇندەرى ۇلتتىق مەملەكەتتىك قاۋىپسىزدىك كوميتەتى توراعاسى قامشىبەك تاشيەۆتى قىزمەتتەن بوساتقان سوڭ ءبىرشاما كادرلىق وزگەرىستەر جاساعان بولاتىن.
