Мемлекет басшысы Қасым-Жомарт Тоқаев Қырғызстан президенті Садыр Жапаровпен телефон арқылы сөйлесті, деп хабарлайды "Адырна" ұлттық порталы Ақордаға сілтеп.
Екі ел басшысы телефон арқылы қазақ-қырғыз қатынасына баға берді.
«Қазақстан президенті қазақ-қырғыз қатынастарының оң динамикасын атап өтті. Бұл тұрақты саяси диалог, үкіметтер мен іскерлік орта арасындағы белсенді өзара әрекеттесу арқылы қамтамасыз етіліп отыр. Екі бауырлас елдің басшылары сауда-экономикалық, көлік-логистика және су-энергетика салаларындағы ынтымақтастықтың жоғары деңгейіне қанағаттанушылық білдірді», - делінген ресми хабарламада.
Қазақстан Президенті Садыр Жапаровтың қоғам бірлігін сақтауға және қырғыз мемлекеттілігін нығайтуға бағытталған шешімдерін қолдау білдірді.
Сондай-ақ, Мемлекет басшысы Қырғызстан президентін Қазақстандағы конституциялық реформа туралы хабардар етіп, оның елдің тұрақты дамуына бағытталғанын жеткізді.
«Сөйлесушілер өңірлік ынтымақтастыққа қатысты барлық мәселелер бойынша бір ауыздан пікір білдірді. Қасым-Жомарт Тоқаев Бішкекте өтетін ШЫҰ саммиті мен Дүниежүзілік көшпенділер ойындары сияқты маңызды халықаралық шараларды сәтті өткізуге тілектестік білдірді. Қазақстан президенті сондай-ақ Қырғызстан қоғамының бірлігін сақтау және мемлекеттік құрылымды нығайтуға бағытталған Садыр Жапаровтың шешімдерін қолдағанын жеткізді», – деп хабарлады Ақорда.
Қырғызстан басшысы соңғы күндері ұлттық мемлекеттік қауіпсіздік комитеті төрағасы Қамшыбек Тәшиевті қызметтен босатқан соң біршама кадрлық өзгерістер жасаған болатын.
