Özbekstan 6U formatyndaǧy «Myrza Ūlyqbek» jasandy ǧylymi sputnigın qūru üşın injenerlık kadrlardy daiyndaudy bastady, dep habarlaidy "Adyrna" ūlttyq portaly Ferǧanaǧa sıltep.
Sputniktı 2028 jyly ūşyru josparlanyp otyr. Sonymen qatar respublika alǧaşqy otandyq ǧaryşkerdı daiarlaudy qolǧa aldy. Būl tapsyrmany el prezidentı Şavkat Mirziioev strategiialyq maŋyzdy joba retınde atap öttı.
Jiynda el basşysy qazırgı älemde ekonomikalyq küş tabiǧi resurstarmen emes, intellektualdy äleuet pen tehnologiialarmen ölşenetının atap öttı. Ǧaryştyq zertteuler strategiialyq maŋyzdy baǧyttardyŋ bırı sanalady.
Qysqa uaqyt ışınde Özbekstan ǧaryştyq derekterdı qoldanuda aitarlyqtai jetıstıkterge jettı. Elde memlekettık ǧaryştyq monitoring jüiesı engızılgen. Mamandardyŋ aituynşa, qaşyqtyqtan zondtau derekterıne sūranys üş ese artqan, qazır jüiemen 10-nan astam memlekettık mekeme jäne barlyq oblystyq äkımdıkter jūmys ısteidı.
Jobanyŋ maŋyzdy bölıgı – ūlttyq jüienı tūraqty damytu. Būl sputnikterdı basqaru, derekterdı öŋdeu jäne praktikalyq qoldanu infraqūrylymyn qalyptastyruǧa baǧyttalǧan. Sputnik jobasyn jüzege asyru üşın şeteldık täjıribe zerttelıp, tehnikalyq talaptar anyqtalǧan.
