"ۇيالى بايلانىس ابونەنتتىك قۇرىلعىلارىن پايدالانۋعا تىيىمدى تەك وقۋ ۋاقىتىندا عانا ەمەس، ءۇزىلىس كەزىندە دە قولدانۋ كيبەربۋللينگ پەن دەسترۋكتيۆتى كونتەنت تاۋەكەلدەرىن ازايتۋعا، مەكتەپتەردەگى ءتارتىپ پەن قاۋىپسىزدىكتى نىعايتۋعا، وقۋشىلاردىڭ تىكەلەي قارىم-قاتىناسى مەن الەۋمەتتەنۋ دەڭگەيىن ارتتىرۋعا، سونداي-اق سالاۋاتتى ءبىلىم بەرۋ ورتاسىن قالىپتاستىرۋعا مۇمكىندىك بەرەدى", دەپ كورسەتىلگەن زاڭ جوباسىنا قوسا بەرىلگەن سالىستىرمالى كەستەدە.
تۇزەتۋ "پەداگوگ مارتەبەسى جانە ءبىلىم بەرۋ ماسەلەلەرى بويىنشا قر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى" زاڭ جوباسى اياسىندا ۇسىنىلعان. وندا قازاقستان رەسپۋبليكاسىنىڭ ء"بىلىم تۋرالى" زاڭى 47-بابى قوزعالىپ وتىر. بۇل باپ ءبىلىم الۋشىلاردىڭ قۇقىقتارى، مىندەتتەرى جانە جاۋاپكەرشىلىگىنە ارنالعان.
47-باپتىڭ 10-تارماعىندا: ء"بىلىم الۋشىلاردى وقۋ پروتسەسىنەن الاڭداتۋعا جول بەرىلمەيدى" دەپ كورسەتىلگەن.
الايدا سمارتفونداردىڭ جاپپاي تارالۋىنا بايلانىستى زاڭناماعا 2024 جىلعى 27 ساۋىردەن باستاپ 10-1-تارماق ەنگىزىلدى:
يدەيا دۇرىس بولعانىمەن، تاجىريبەدە "ەرەكشە جاعداي" نەگىزگى ەرەجەگە اينالىپ كەتتى. سەبەبى قىسقا مەرزىمدى وقۋ جوسپارلارىن مەكتەپتەردىڭ ءوزى بەكىتەدى. سونىڭ ناتيجەسىندە ءار مەكتەپ سمارتفون پايدالانۋ ءتارتىبىن وزىنشە بەلگىلەي باستادى.
كەي مەكتەپتەردە اكىمشىلىك ساباق كەزىندە تەلەفونداردى جيناپ الىپ، ۇزىلىستە عانا قولدانۋعا رۇقسات بەردى. ال كوپتەگەن مەكتەپتەردە اتا-انالاردىڭ بالالارىمەن تۇراقتى بايلانىستا بولۋ تالابىنا بايلانىستى سمارتفوندار وقۋشىلاردىڭ قولىندا قالا بەردى. ساباق كەزىندە تەك پايدالانۋعا تىيىم سالىنعانىمەن، بۇل تالاپتى باقىلاۋ ءاردايىم ءتيىمدى بولا بەرمەدى.
"ورتا ءبىلىم بەرۋ ۇيىمدارىندا وقۋ پروتسەسى كەزىندە ءبىلىم الۋشىلاردىڭ ۇيالى بايلانىس ابونەنتتىك قۇرىلعىلارىن پايدالانۋىنا جول بەرىلمەيدى، ءبىلىم بەرۋ سالاسىنداعى ۋاكىلەتتى ورگان بەكىتكەن ۇيالى بايلانىس ابونەنتتىك قۇرىلعىلارىن پايدالانۋ قاعيدالارىندا كوزدەلگەن جاعدايلاردى قوسپاعاندا", دەپ كورسەتىلگەن ۇسىنىلىپ وتىرعان جاڭا رەداكتسيادا.ياعني بۇدان بىلاي سمارتفون قولدانۋ ءتارتىبىن ءار مەكتەپ جەكە ءوزى ەمەس، وقۋ-اعارتۋ مينيسترلىگى بەكىتەتىن بىرىڭعاي ۇلگىلىك قاعيدالار ارقىلى رەتتەيدى.
قاعيدالاردا ناقتى قانداي تالاپتار بولاتىنى ازىرگە بەلگىسىز، ويتكەنى زاڭ ءالى قابىلدانباعان. دەگەنمەن زاڭ جوباسىنداعى تۇسىندىرمەگە قاراعاندا، تالاپتار قاتاڭداتىلۋى مۇمكىن. ماسەلەن، مەكتەپ اۋماعىنا كىرگەننەن باستاپ شىققانعا دەيىن سمارتفون پايدالانۋعا تولىق تىيىم سالىنۋى ىقتيمال.
ماڭىزدىسى – بۇل شەكتەۋ بارلىق مەكتەپكە بىردەي قولدانىلماق.
قازىر مەكتەپ اكىمشىلىگى ساباق كەزىندە سمارتفون قولدانۋعا تىيىم سالسا، ال وقۋشى ونى بۇزسا، بۇل قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسى 409-بابىنا ء("بىلىم بەرۋ، دەنە شىنىقتىرۋ جانە سپورت سالاسىنداعى زاڭنامانى بۇزۋ") سايكەس قارالادى.
بۇل جاعدايدا اتا-انالارعا ەسكەرتۋ نەمەسە 5 اەك (21 625 تەڭگە، 1 اەك – 4 325 تەڭگە) مولشەرىندە ايىپپۇل سالىنۋى مۇمكىن. ءبىر جىل ىشىندە قايتالانسا – 20 اەك ايىپپۇل قاراستىرىلعان.
ال مەكتەپ اكىمشىلىگى مەن پەداگوگتەردىڭ جاۋاپكەرشىلىگى ناقتى كورسەتىلمەگەن.
ەگەر ۇسىنىلعان تۇزەتۋلەر قابىلدانسا، جاۋاپكەرشىلىك مەكتەپتەردىڭ وزىنە دە جۇكتەلەدى. 409-باپتىڭ 4-بولىگىنە سايكەس، ءبىلىم بەرۋ ۇيىمدارى ۇلگىلىك قاعيدالاردى ساقتاماسا، ايىپپۇل سالىنادى:
- لاۋازىمدى تۇلعالارعا – 10 اەك;
- شاعىن بيزنەس نەمەسە كوممەرتسيالىق ەمەس ۇيىمدارعا – 15 اەك;
- ورتا بيزنەسكە – 20 اەك;
- ءىرى بيزنەسكە – 25 اەك جانە ليتسەنزيانىڭ قولدانىلۋىن توقتاتا تۇرۋ جازاسى قاراستىرىلعان.
وسىلايشا، ەگەر وزگەرىستەر قابىلدانسا، جاقىن ۋاقىتتا مەكتەپ سىنىپتارىندا سمارتفوندار كوزدەن مۇلدە تاسا بولۋى مۇمكىن.
