Jambyl oblysyndaǧy Gvardeisk garnizonynda ornalasqan äskeri bölımderdıŋ bırınde äskeri qyzmetker jaraqat aldy. Bas äskeri polisiia basqarmasy küş qoldanu faktısı boiynşa qylmystyq ıs qozǧady, dep habarlaidy «Adyrna» tılşısı.
Sarbaz Almaty qalasyndaǧy äskeri-klinikalyq gospitalǧa jatqyzylǧan.
«Atalǧan fakt boiynşa materialdar Sotqa deiıngı tergep-tekserudıŋ bıryŋǧai tızılımıne tırkeldı. Qazırgı uaqytta jan-jaqty tekseru jürgızılude. Tergeu barysynda oqiǧaǧa qatysy bar tūlǧalardyŋ, sondai-aq jarǧyǧa qaişy özara qatynas faktısı turaly joǧary tūrǧan qolbasşylyqqa der kezınde baiandamaǧan jäne medisinalyq kömektı ūiymdastyruda kemşılık jıbergen lauazymdy tūlǧalardyŋ äreketterıne qūqyqtyq baǧa berıledı. Tergeu qorytyndysy boiynşa kınälı tūlǧalar Qazaqstan Respublikasynyŋ zaŋnamasyna säikes qataŋ jauapqa tartylady. Oqiǧa qaruly küşter basşylyǧynyŋ erekşe baqylauynda», — delıngen habarlamada.
Tergeu kezınde äskeri bölımdegı bırqatar ofiser qyzmetınen uaqytşa şettetılgen.
