ۇلىبريتانيا، شۆەتسيا، فرانتسيا، گەرمانيا جانە نيدەرلاند بيلىگى رەسەيلىك وپپوزيتسيالىق ساياساتكەر الەكسەي ناۆالنىي ولىمىنە ەپيباتيدين اتتى ۋلى زات سەبەپ بولۋى مۇمكىن ەكەنىن مالىمدەدى. بۇل تۋرالى ۇلىبريتانيانىڭ سىرتقى ىستەر مينيسترلىگى (فورين-وفيس) تاراتقان ءباسپاسوز حابارلاماسىندا ايتىلعان، دەپ حابارلايدى “ادىرنا” پورتالى ۆۆس-گە سىلتەپ.
ەۋروپالىق بەس ەلدىڭ مالىمەتىنشە، ناۆالنىيدىڭ بيوماتەريالدارىنا جۇرگىزىلگەن بىرنەشە تاۋەلسىز زەرتحانالىق ساراپتاما ونىڭ اعزاسىندا ەپيباتيدين بار ەكەنىن كورسەتكەن. اتالعان ۇلگىلەردى ساياساتكەردىڭ وتباسى شەتەلگە شىعارا العانى حابارلاندى.
ەپيباتيدين – وڭتۇستىك امەريكاداعى ۋلى اعاش باقالارى بولەتىن كۇشتى نەيروتوكسين. ماماندار ونىڭ جوعارى ۋىتتىلىعىن جانە جۇيكە جۇيەسىنە اسەر ەتەتىنىن اتاپ وتەدى. بريتان تاراپىنىڭ مالىمدەۋىنشە، بۇل زات رەسەي تابيعاتىندا كەزدەسپەيدى.
فورين-ءوفيستىڭ حابارلاۋىنشا، ەپيباتيديننىڭ ۋىتتىلىعى مەن ناۆالنىيدىڭ ولىمىنە دەيىن بايقالعان بەلگىلەردى ەسكەرە وتىرىپ، ۋلانۋ ونىڭ قايتىس بولۋىنا ىقتيمال سەبەپ بولعان.
بەس ەل بۇل جايت بويىنشا حيميالىق قارۋعا تىيىم سالۋ ۇيىمىن رەسەيدىڭ حيميالىق قارۋعا تىيىم سالۋ تۋرالى كونۆەنتسيانى بۇزۋى مۇمكىن دەگەن كۇدىكپەن رەسمي تۇردە حاباردار ەتكەن.
ەسكە سالساق، الەكسەي ناۆالنىي 2020 جىلدىڭ تامىزىندا «نوۆيچوك» دەپ اتالاتىن اسكەري ۋمەن ۋلانعاننان كەيىن شەتەلدە ەم قابىلداپ، كەيىن رەسەيگە ورالعان ەدى. رەسەي بيلىگى بۇل ۋلانۋعا قاتىسى بارىن جوققا شىعارعان. سونىمەن قاتار ماسكەۋ تاراپى ناۆالنىي تۇرمەدە تابيعي سەبەپتەردەن قايتىس بولدى دەگەن ۇستانىمدى العا تارتادى.
«نوۆيچوك» زاتى 2018 جىلى ۇلىبريتانيانىڭ سولسبەري قالاسىندا دا قولدانىلعان. سول وقيعا سالدارىنان دون ستەردجەسس قازا تاپقان بولاتىن.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا بەس ەلدىڭ مالىمدەمەسىنە قاتىستى پىكىر ءبىلدىرىپ، ناقتى زەرتحانالىق ناتيجەلەر مەن زاتتاردىڭ فورمۋلالارى ۇسىنىلمايىنشا، بۇل ايىپتاۋلاردى «اقپاراتتىق ناۋقان» دەپ باعالايتىنىن ايتتى.
ساياساتكەردىڭ ايەلى يۋليا ەۋروپالىق ەلدەرگە جۇرگىزىلگەن زەرتتەۋ ءۇشىن العىس ءبىلدىرىپ، كۇيەۋىنىڭ ۋلانعانىنا العاشقى كۇننەن باستاپ سەنىمدى بولعانىن مالىمدەدى. ونىڭ ايتۋىنشا، ەكى ەلدەگى ەكى زەرتحانا ءبىر-بىرىنەن تاۋەلسىز تۇردە ۋلانۋ فاكتىسىن راستاعان.
قازىرگى ۋاقىتتا بۇل ماسەلە حالىقارالىق دەڭگەيدە تالقىلانىپ، رەسمي ماسكەۋ مەن باتىس ەلدەرى اراسىنداعى ساياسي پىكىرتالاستى كۇشەيتىپ وتىر.
