باتىس قازاقستان وبلىسىنىڭ اكىمى ناريمان تورەعاليەۆ قورعانىس سالاسىنىڭ ارداگەرى، گەنەرال-مايور حايرەتدين راسقاليەۆتى قابىلداپ، مەرەيلى 75 جاسقا تولۋىمەن قۇتتىقتادى.
ءىى دارەجەلى «ايبىن» وردەنى، پرەزيدەنتتىڭ قۇرمەت گراموتاسى جانە بىرنەشە مەدالدىڭ يەگەرى حايرەتدين راسقاليەۆ ەڭبەك جولىن وفيتسەردەن باستاپ، قر قارۋلى كۇشتەرى باس شتابى باستىعىنىڭ ورىنباسارى، قر قورعانىس مينيسترلىگىنىڭ باس شتابى ورتالىق كوماندالىق پۋنكتىنىڭ باستىعىنا دەيىن كوتەرىلدى.
ەڭبەك ارداگەرى ءوزى قىزمەت ەتكەن جىلدارى ەلىمىزگە جاڭا اسكەري اۋە تەحنيكاسىن اكەلۋگە ايرىقشا اتسالىستى. زەينەتكە شىققان سوڭ وڭىردەگى اۋە قاتىناسىنىڭ ساپاسىن جاقسارتۋعا زور ۇلەس قوستى.
ايماق باسشىسى اسكەري قايراتكەردىڭ وتانعا دەگەن ادال قىزمەتى، كۇشتىك قۇرىلىمدارداعى باي تاجىريبەسى كەيىنگى بۋىن ءۇشىن ناعىز ۇلگى-ونەگە ەكەنىن ايتتى. جاستاردى پاتريوتتىق رۋحتا تاربيەلەۋدەگى ەڭبەگىن جوعارى باعالاپ، سىي-قۇرمەت كورسەتتى.
مەرەيتوي يەسى جىلى قابىلداۋ ءۇشىن ريزاشىلىعىن ءبىلدىرىپ، اۋىل-ەلدىڭ اماندىعىن تىلەدى.
