الماتىدا كولىك جوندەۋ ورتالىعىنىڭ قىزمەتكەرىن كەشكى ۋاقىتتا ۇرىپ، ءولتىرىپ كەتكەنى بەلگىلى بولدى، دەپ حابارلايدى "ادىرنا".
جانتۇرشىگەرلىك وقيعا 10 اقپان كۇنى ساعات 17:18-دە بولعان. جاعدايدىڭ قالاي بولعانىن مارقۇمنىڭ ۇلى الەۋمەتتىك جەلىدە جاريالادى. ايتۋىنشا، اكەسىن ءۇش ەر ادام جابىلىپ ۇرىپ كەتكەن. كۇتپەگەن سوققى الدىمەن كوشەدە باستالىپ، مارقۇمدى ەسىنەن تاندىرعان سوڭ كولىك جوندەۋ ورتالىعىنىڭ ىشىندە جالعاسقان.
«ۇيىقتاماعانىما ءۇش تاۋلىك بولدى، سەبەبى كوز الدىمدا مىنا ۆيدەو، اكەمدى كۇتپەگەن سوققىمەن ەسىنەن تاندىرىپ، ادامدى ەمەس قوقىستى تاسىعانداي ەدەننىڭ ۇستىمەن سۇيرەگەن. جارتى ساعات بۇرىن عانا مىنا ۆيدەو قولىما ءتۇستى، وندا ەسىنەن تانىپ جاتقان ساتىندە باسىنان ۇرىپ جاتقانىن كورۋگە بولادى. ادام ەمەستەر. اكەمدى جارتى ساعات بويى ۇرىپ ولتىرگەن. وتىنەمىن، قوعامدىق رەزونانس جاساڭىزدارشى»، – دەپ جازدى مارقۇمنىڭ ۇلى.
وقيعاعا قاتىستى قالالىق پوليتسيا دەپارتامەنتى رەسمي تۇردە تۇسىنىكتەمە بەردى.
«اتالعان فاكتى بويىنشا تۇركسىب اۋدانىنىڭ پوليتسيا باسقارماسى دەنساۋلىققا زيان كەلتىرۋ، ياعني دەنە جاراقاتىن سالۋ دەرەگى بويىنشا قىلمىستىق ءىس قوزعادى. جەدەل-تەرگەۋ ءىس-شارالارى بارىسىندا كۇدىكتى انىقتالىپ، ۇستالدى جانە ۋاقىتشا ۇستاۋ يزولياتورىنا قامالدى.
قازىرگى ۋاقىتتا وقيعانىڭ بارلىق ءمان-جايىن جان-جاقتى، تولىق جانە وبەكتيۆتى انىقتاۋعا باعىتتالعان تەرگەۋ ارەكەتتەرى جۇرگىزىلىپ جاتىر»، – دەلىنگەن پوليتسيا دەپارتامەنتىنىڭ تۇسىنىكتەمەسىندە.
