Almatyda kölık jöndeu ortalyǧynyŋ qyzmetkerın keşkı uaqytta ūryp, öltırıp ketkenı belgılı boldy, dep habarlaidy "Adyrna".
Jantürşıgerlık oqiǧa 10 aqpan künı saǧat 17:18-de bolǧan. Jaǧdaidyŋ qalai bolǧanyn marqūmnyŋ ūly äleumettık jelıde jariialady. Aituynşa, äkesın üş er adam jabylyp ūryp ketken. Kütpegen soqqy aldymen köşede bastalyp, marqūmdy esınen tandyrǧan soŋ kölık jöndeu ortalyǧynyŋ ışınde jalǧasqan.
«Ūiyqtamaǧanyma üş täulık boldy, sebebı köz aldymda myna video, äkemdı kütpegen soqqymen esınen tandyryp, adamdy emes qoqysty tasyǧandai edennıŋ üstımen süiregen. Jarty saǧat būryn ǧana myna video qolyma tüstı, onda esınen tanyp jatqan sätınde basynan ūryp jatqanyn köruge bolady. Adam emester. Äkemdı jarty saǧat boiy ūryp öltırgen. Ötınemın, qoǧamdyq rezonans jasaŋyzdarşy», – dep jazdy marqūmnyŋ ūly.
Oqiǧaǧa qatysty qalalyq Polisiia departamentı resmi türde tüsınıkteme berdı.
«Atalǧan faktı boiynşa Türksıb audanynyŋ Polisiia basqarmasy densaulyqqa ziian keltıru, iaǧni dene jaraqatyn salu deregı boiynşa qylmystyq ıs qozǧady. Jedel-tergeu ıs-şaralary barysynda küdıktı anyqtalyp, ūstaldy jäne uaqytşa ūstau izoliatoryna qamaldy.
Qazırgı uaqytta oqiǧanyŋ barlyq män-jaiyn jan-jaqty, tolyq jäne obektivtı anyqtauǧa baǧyttalǧan tergeu äreketterı jürgızılıp jatyr», – delıngen Polisiia departamentınıŋ tüsınıktemesınde.
