پاۆلودار قالاسىندا جوعالىپ كەتكەن التى جاستاعى قىز جەدەل ىزدەستىرۋ جۇمىستارىنىڭ ناتيجەسىندە امان-ەسەن تابىلدى. وقيعا تۋرالى قر ءىىم ۇلتتىق ۇلانىنىڭ «شىعىس» وڭىرلىك قولباسشىلىعىنىڭ ءباسپاسوز قىزمەتى جاريالادى، دەپ حابارلايدى "ادىرنا".
مالىمەتكە سايكەس، ساعات 22:10 شاماسىندا پاۆلودار قالاسىنداعى نازارباەۆ كوشەسىن پاترۋلدەۋ كەزىندە 5512 اسكەري ءبولىمىنىڭ اسكەري قىزمەتشىلەرىنە ايەل ادام جۇگىنىپ، التى جاستاعى قىزىنىڭ جوعالىپ كەتكەنىن ايتقان. اقپاراتتى العان ساقشىلار بىردەن ىزدەستىرۋ شارالارىنا كىرىسىپ، بالانىڭ بولۋى مۇمكىن باعىتتارىن تەكسەرىپ، جاقىن ماڭداعى كوشەلەر مەن قوعامدىق ورىنداردى قاراپ شىققان.
جەدەل ءارى ۇيلەسىمدى ارەكەتتەردىڭ ناتيجەسىندە كىشكەنتاي قىز بايزاقوۆ اتىنداعى فيلارمونيا ماڭىنان تابىلىپ، اناسىنا تاپسىرىلدى. قىزدىڭ ءومىرى مەن دەنساۋلىعىنا قاۋىپ تونبەگەن.
ۆەدومستۆو وكىلدەرى مۇنداي جاعدايلاردا ۋاقىتتى جوعالتپاي، بىردەن قۇقىق قورعاۋ ورگاندارىنا حابارلاسۋدىڭ ماڭىزىن ەسكە سالدى.
