ۇلتتىق ۇلاننىڭ 6506 اسكەري بولىمىندە بۇرىن ءبىر سىنىپتا وقىعان 12 سارباز اسكەري بورىشىن وتەپ جاتىر، دەپ حابارلايدى «ادىرنا» ءتىلشىسى.
ولار الماتى وبلىسى، جامبىل اۋدانى، ۇمبەتالى كارىباەۆ اتىنداعى ورتا مەكتەپتى بىرگە تامامداعان.
ءبولىم باسشىلىعىنىڭ ايتۋىنشا، مۇنداي جاعداي وتە سيرەك كەزدەسەدى. سەبەبى ءبىر اۋداننان ءبىر اسكەري بولىمگە ءتۇسۋ – ۇلكەن كەزدەيسوقتىق.
ء«بىز بالا كەزىمىزدەن بىرگە ءوسىپ كەلەمىز. اسكەرگە بارۋدى سانالى تۇردە شەشتىك. ەشكىم قاشقان جوق، كەرىسىنشە، بارۋعا ىنتالى بولدىق. ءبىزدى ءبىر اسكەري بولىمگە بولگەندە ءوزىمىز دە تاڭ قالدىق. قازىر ءبىر كوماندا سياقتىمىز»،- دەيدى قاتارداعى جاۋىنگەر راسۋل ساۋتوۆ.
قازىرگى ۋاقىتتا ساربازدار وقۋ پۋنكتىندە باستاپقى اسكەري دايىندىقتان ءوتىپ، اسكەري قىزمەتتىڭ نەگىزدەرىن مەڭگەرۋدە. كومانديرلەر ولاردىڭ ۇيىمشىلدىعى مەن ءبىر-بىرىنە كومەك كورسەتۋىن جوعارى باعالايدى.
ء«بىز وتانىمىزدى قورعاۋ ءۇشىن بىرگە تۇرعانىمىزعا ماقتانامىز. مۇندا ءبىز ءبىر-ءبىرىمىزدى مەكتەپتەگىدەي قولدايمىز. وسىنداي ۇجداندى بىرلىك اسكەري ومىرگە تەزىرەك بەيىمدەلۋگە كومەكتەسەدى»،- دەيدى قاتارداعى جاۋىنگەر مارات بەيبارىس.
ايتا كەتەيىك، باستاپقى اسكەري دايارلىق كۋرسى ءبىر ايعا سوزىلادى. 24 قاڭتاردا مەرزىمدى اسكەري قىزمەتتەگى جاۋىنگەرلەر اسكەري انت قابىلدايتىن بولادى، ودان كەيىن شىمكەنت قالاسىندا قوعامدىق ءتارتىپتى ساقتاۋ بويىنشا قىزمەتىن اتقارۋدى باستايدى.
