مەملەكەتتىك كەڭەسشى ەرلان قارين «ەجەلگى زاماننان بۇگىنگى كۇنگە دەيىنگى قازاقستان تاريحى» اتتى جاڭا اكادەميالىق باسىلىمنىڭ رەداكتسيا مۇشەلەرىمەن كەزدەسۋ وتكىزدى، دەپ حابارلايدى «ادىرنا» ۇلتتىق پورتالى.
جيىن بارىسىندا اتالعان كوپتومدىقتى ازىرلەۋ بارىسى قارالدى.
اكادەميالىق باسىلىمنىڭ ءار تومىنىڭ جەتەكشىلەرى – ءا.ح.مارعۇلان اتىنداعى ارحەولوگيا ينستيتۋتىنىڭ باس ديرەكتورى اقان وڭعار، جوشى ۇلىسىن زەرتتەۋ عىلىمي ينستيتۋتىنىڭ ديرەكتورى جاقسىلىق ءسابيتوۆ، ش.ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ، ر.ب. سۇلەيمەنوۆ اتىنداعى شىعىستانۋ ينستيتۋتى جانىنداعى تاريحي ماتەريالداردى زەرتتەۋ جونىندەگى رەسپۋبليكالىق اقپاراتتىق ورتالىقتىڭ ديرەكتورى مەرۋەرت ابۋسەيىتوۆا، مەملەكەت تاريحى ينستيتۋتىنىڭ ديرەكتورى بۇركىتباي اياعان مەملەكەتتىك كەڭەسشىنى جالپىالەمدىك ۇدەرىستەر اياسىندا قازاقستان تاريحىنىڭ نەگىزگى كەزەڭدەرى قالاي جازىلىپ جاتقانىنان حاباردار ەتتى.
ەرلان قارين عىلىمي ءىسساپار بارىسىندا شەتەل ارحيۆتەرىنەن تابىلعان ءتول تاريحىمىزعا قاتىستى جاڭا مۇراعات قۇجاتتارى جانە سوڭعى جىلدارداعى ارحەولوگيالىق زەرتتەۋلەردىڭ قورىتىندىلارى وسى ىرگەلى عىلىمي ەڭبەككە ەنۋگە ءتيىس ەكەنىن ايتتى.
سونىمەن قاتار مەملەكەتتىك كەڭەسشى ساپالى باسىلىم دايىنداۋ بارىسىندا عالىمداردىڭ بۇل جۇمىسقا جاۋاپكەرشىلىكپەن قاراۋىن، اۆتورلار مەن رەداكتورلاردىڭ تىنىمسىز ەڭبەك ەتۋ ماڭىزىن اتاپ ءوتتى.
«ادىرنا» ۇلتتىق پورتالى
