قىرعىزستان سوت ورىنداۋشىلارى ەلدىڭ بۇرىنعى پرەزيدەنتى المازبەك اتامباەۆتىڭ وتباسىن بىشكەك ماڭىنداعى قوي-تاش اۋىلىنداعى سارايىنان كۇشتەپ شىعاردى، دەپ حابارلايدى "ادىرنا" ۇلتتىق پورتالى.
بۇل تۋرالى ونىڭ ۇلى قادىربەك اتامباەۆ الەۋمەتتىك جەلىدەگى پاراقشاسىندا حابارلاپ، بيلىك ارەكەتىن «زاڭسىزدىق» دەپ باعالادى.
«مەنىڭ انامدى، وتباسىمنىڭ مۇشەلەرىن قوي-تاشتاعى ۇيدەن زاڭسىز شىعارماقشى. اتا-بابامىزدىڭ جەرىندە، بار بولعانى 100 مەتر جەردە بارلىق تۋىستارىمىز جەرلەنگەن. بۇل — ناعىز باسسىزدىق»، - دەدى ول.
ونىڭ ايتۋىنشا، ءىس قالالىق سوتتا قارالىپ جاتقانىمەن، سوت ورىنداۋشىلارى «جوعارىدان تۇسكەن نۇسقاۋ» بويىنشا وتباسى مۇشەلەرىن ەش ەسكەرتۋسىز كوشەگە شىعارىپ، زاتتارىن كونتەينەرگە تيەپ اكەتكەن.
اتامباەۆتىڭ قىزى ءاليا شاعيەۆا دا سوت شەشىمى نەمەسە رەسمي قۇجات كورسەتىلمەگەنىن ايتىپ، وتباسىنىڭ جاۋىن استىندا قالعانىن جەتكىزدى. قازىر ولار تۋىستارىنىڭ ۇيىندە تۇرىپ جاتىر.
مەملەكەتتىك اكتيۆتەردى باسقارۋ اگەنتتىگى ءۇيدىڭ سوت شەشىمىمەن مەملەكەتكە قايتارىلعانىن مالىمدەدى. بۇل جەردە قارتتار ءۇيى مەن 500 بالاعا ارنالعان بالاباقشا سالۋ جوسپارلانىپ وتىر. قۇرىلىس جۇمىستارى الداعى ۋاقىتتا باستالىپ، كەلەسى جىلى اياقتالماق.
ەسكە سالايىق، 2019 جىلى قوي-تاشتا اتامباەۆتى ۇستاۋ وپەراتسياسى كەزىندە قاقتىعىس بولىپ، ءبىر ارنايى قىزمەت وكىلى قازا تاۋىپ، جۇزدەن استام ادام جارالانعان ەدى. 2022 جىلى باستالعان سوت پروتسەسىنە كەيىن سىبايلاس جەمقورلىق ىستەرى قوسىلدى.
2023 جىلى اتامباەۆ يسپانياعا ەمدەلۋگە كەتكەننەن بەرى وتانىنا ورالعان جوق. بيىل ماۋسىمدا سوت ونى 11 جىل 6 ايعا باس بوستاندىعىنان ايىرىپ، مۇلكىن تاركىلەۋ جانە مەملەكەتتىك ناگرادالارىنان ايىرۋ تۋرالى ۇكىم شىعاردى. پرەزيدەنت سادىر جاپاروۆ ۇكىمدى قاتاڭ دەپ اتاپ، ەگەر اتامباەۆ وكىلدەرى ءوتىنىش بىلدىرسە، ونى كەشىرۋگە دايىن ەكەنىن مالىمدەدى.
