سانكت-پەتەربۋرگتە اسكەري سوت قازاقستاندىق ستۋدەنتتى تەرروريزمدى اقتاۋ ءىسى بويىنشا 2 جىلعا سوتتادى. بۇل تۋرالى «فونتانكا» باسىلىمى جازدى، دەپ حابارلايدى «ادىرنا» ءتىلشىسى.
ءىس جەڭىلدەتىلگەن تارتىپپەن قارالعان. مەملەكەتتىك ايىپتاۋشى گارري ازاريانعا ءۇش جىل جالپى رەجيمدەگى تۇرمە سۇراسا، ادۆوكاتى ايىپپۇل سالۋدى تالاپ ەتكەن.
تەرگەۋ نۇسقاسى بويىنشا ازاريان بيلىكتى كۇشپەن قۇلاتۋدى ۇسىنعان. پروكۋرور اۋىرلاتاتىن جاعداي رەتىندە ستۋدەنتتىڭ رەسەيدىڭ ۋكرايناداعى سوعىسقا بايلانىستى موبيليزاتسيا كەزەڭىندە پىكىر بىلدىرگەنىن اتاپ ءوتتى.
ازاريان سوڭعى سوزىندە كىناسىن مويىنداپ، وكىنىش ءبىلدىردى. ول قوعامعا قايتا ورالىپ، پايدالى بولعىسى كەلەتىنىن جانە راديكالدى ارەكەتتەرگە ەندى بارمايتىنىن ايتقان.
23 جاستاعى گارري ازاريان قازاقستاننان سانكت-پەتەربۋرگكە كەلىپ، سانكت-پەتەربۋرگ مەملەكەتتىك ۋنيۆەرسيتەتىن اياقتاعان، كەيىن ماگيستراتۋراعا تۇسكەن. 2025 جىلدىڭ مامىرىندا ول «سولشىل راديكالدى تەرروريزم» ءىسى بويىنشا قاماۋعا الىنعان. تەرگەۋ ونىڭ «جۇمىسشى بيلىگى» ۇيىمىنىڭ ستۋدەنتتىك ۇياشىعىندا بولعانىن جانە بەيرەسمي جينالىستاردا «رەۆوليۋتسيا، تاپتىق وشپەندىلىك، كوشەدەگى كۇش» تۋرالى سويلەگەنىن العا تارتقان.
ازاريان سەگىز اي تەرگەۋ يزولياتورىندا وتىرىپ، بيىل قاڭتاردا «بەلگىلى ءبىر ارەكەتتەرگە تىيىم سالۋ» شارتىمەن بوساتىلعان. قازاقستاندىق ادام قۇقىقتارى بيۋروسى ازارياننىڭ رەسەيلىك قۇقىق قورعاۋ ورگاندارىنىڭ نازارىنا «جۇمىسشى بيلىگى» ۇيىمىنىڭ 2025 جىلعى 24 ناۋرىزداعى اكتسياسىنان كەيىن تۇسكەنىن حابارلاعان. سول كەزدە ولار سپبگۋ جانىنداعى ەسكەرتكىشكە دانالىق قۇدايى مينەرۆانىڭ قۋىرشاعىن ءىلىپ، «عىلىم ءولدى» دەگەن جازۋ قالدىرعان.
ال ريا نوۆوستي دەرەككوزى بۇل ۇيىمنىڭ ستۋدەنتتىك «ۇياشىعى» ۋنيۆەرسيتەتتە شامامەن ءبىر جىل بۇرىن قۇرىلعانىن، بىراق تەك كوكتەمدە بەلسەندى تۇردە كورىنە باستاعانىن جازعان. اگەنتتىك ولاردى حالىقارالىق سولشىل راديكالدى ۇيىمدارمەن بايلانىستىرعان.
