نوكىستەگى نارازىلىق بويىنشا ايىپتالعان داۋلەتمۇرات ءتاجىمۇراتوۆ 16 جىلعا سوتتالدى، دەپ حابارلايدى “ادىرنا” ۇلتتىق پورتالى ازاتتىق سايتىنا سىلتەپ.
31 قاڭتاردا قاراقالپاقستان سوتىنىڭ سۋدياسى ەلۋباي ابيبۋللاەۆ نوكىستەگى نارازىلىق بويىنشا ايىپتالعان 22 ادامنىڭ ىسىنە قاتىستى ۇكىم شىعاردى.
ۇكىم بويىنشا، "ەل قىزمەتىندە" ("ەل حىزمەتيندە") گازەتىنىڭ ادۆوكاتى داۋلەتمۇرات ءتاجىمۇراتوۆ 16 جىلعا سوتتالدى. سوت ونى "وزبەكستاننىڭ كونستيتۋتسيالىق قۇرىلىمىن بۇزۋ نەمەسە بيلىكتى باسىپ الۋ ماقساتىندا ءسوز بايلاسۋ" جانە "جاپپاي تارتىپسىزدىك ۇيىمداستىرۋ" باپتارىمەن ايىپتى دەپ تانىدى. بۇعان دەيىن پروكۋرورلار داۋلەتمۇرات ءتاجىمۇراتوۆتى 18 جىلعا سوتتاۋدى سۇراعان.
جازا مەرزىمى ول قاماۋعا الىنعان 2022 جىلعى 2 شىلدەدەن باستاپ ەسەپتەلەدى. ۇكىمگە ساي، ءتاجىمۇراتوۆ 228,8 ميلليون سۋم (20 مىڭ دوللاردان استام) كولەمىندە شىعىن دا وتەۋى كەرەك.
ودان بولەك، ازامات تۋردانوۆ، احمەت سمەتۋللاەۆ جانە ازامات نۋراتدينوۆتەر باس بوستاندىعىن شەكتەۋ جازاسىن الدى، Makan.uz سايتىنىڭ نەگىزىن قالاۋشى، جۋرناليست لولاگۇل قاللىحانوۆاعا شارتتى جازا تاعايىندالدى. سوت بۇلتارتپاۋ شاراسىن وزگەرتىپ، ولاردى زالدان بوساتتى.
ەسكە سالايىق، بىلتىر شىلدەدە قاراقالپاقستاندا تاشكەنتتىڭ كونستيتۋتسيانى وزگەرتۋ تۋرالى باستاماسىنا قارسى نارازىلىق بولعان.تاشكەنت ۇسىنعان تۇزەتۋلەر اراسىندا قاراقالپاقستان اۆتونوم رەسپۋبليكاسىن وزبەكستان قۇرامىنان شىعۋ قۇقىعىنان ايىراتىن پۋنكت بولدى.
قاراقالپاقستانداعى نارازىلىقتى باسىپ-جانشۋ كەزىندە كەمى 21 ادام قازا بولعان، اراسىندا كۇش قۇرىلىمدارىنىڭ ءتورت قىزمەتكەرى بار. 270-تەن استام ادام جارالانعان. جاپپاي نارازىلىقتان كەيىن تاشكەنت داۋلى تۇزەتۋلەردى جوبادان الىپ تاستادى. بيلىك "تارتىپسىزدىكتى قوزدىرعان" سىرتقى كۇشتەردى ايىپتادى.
