قازاقستاننىڭ سىبايلاس جەمقورلىقتى قابىلداۋ جاھاندىق يندەكسىندەگى پوزيتسياسى تومەندەدى. 2025 جىلدىڭ قورىتىندىسى بويىنشا ەلىمىز 100 بالدىڭ ىشىندە 38 بالل جينادى. بۇل تۋرالى Transparency International Kazakhstan جازدى، دەپ حابارلايدى «ادىرنا» ءتىلشىسى.
حالىقارالىق ۇيىم 2025 جىلعا ارنالعان جىل سايىنعى سىبايلاس جەمقورلىق يندەكسىن جاريالادى. بۇل رەيتينگكە 182 ەل مەن اۋماق كىرگەن. يندەكس ساراپشىلار مەن بيزنەس قاۋىمداستىعىنىڭ باعالاۋلارىنا نەگىزدەلىپ، مەملەكەتتىك سەكتورداعى سىبايلاس جەمقورلىق دەڭگەيىن قابىلداۋ كورسەتكىشىن 0-دەن 100-گە دەيىنگى شكالا بويىنشا ولشەيدى.
«يندەكس ءارتۇرلى ەلدەردەگى سىبايلاس جەمقورلىق دەڭگەيىن باعالاۋ جانە سالىستىرۋ ءۇشىن نەگىزگى حالىقارالىق قۇرال بولىپ قالا بەرەدى»، – دەلىنگەن حابارلامادا.
2025 جىلدىڭ قورىتىندىسى بويىنشا قازاقستان 38 بالل جيناپ، 182 ەلدىڭ ىشىندە 96-ورىنعا تۇراقتادى. بۇل وتكەن جىلمەن سالىستىرعاندا 2 باللعا تومەن.
ەلىمىز بالل سانى بويىنشا ەفيوپيا جانە سۋرينام ەلدەرىمەن ءبىر قاتاردا، ال كولۋمبيا، دومينيكان رەسپۋبليكاسى، گامبيا، لەسوتو مەن زامبيادان ءبىر ساتى جوعارى، مالديۆ، ماروككو مەن تۋنيستەن ءبىر ورىن تومەن تۇر.
Transparency International مالىمەتىندە رەيتينگتەگى ورىننان گورى جيناعان بالل ماڭىزدىراق ەكەنى اتاپ ءوتىلدى.
«50 بالدان تومەن ناتيجە العان ەلدەر سىبايلاس جەمقورلىق دەڭگەيى جوعارى مەملەكەتتەر قاتارىنا جاتادى. شىعىس ەۋروپا جانە ورتالىق ازيا وڭىرىندە بۇل مەجەدەن تەك گرۋزيا (50 بالل) عانا ءوتتى. قازاقستاندى (38 بالل) كورشى ەلدەرمەن سالىستىرساق: وزبەكستان — 31 بالل (124-ورىن); قىرعىزستان — 26 بالل (142-ورىن); رەسەي — 22 بالل (157-ورىن); تۇرىكمەنستان — 17 بالل (167-ورىن). شىعىس ەۋروپا جانە ورتالىق ازيا ءوڭىرى 100 بالدىق شكالا بويىنشا ورتاشا ەسەپپەن 34 بالل جينادى. 19 ەلدىڭ التاۋىندا كورسەتكىش تومەندەسە، تەك جەتى ەلدە عانا وڭ ديناميكا بايقالدى. بۇل رەفورمالاردىڭ باياۋلاعانىن جانە ينستيتۋتتاردىڭ السىزدىگىن كورسەتەدى»، - دەپ تولىقتىرعان Transparency International Kazakhstan.
