Qazaqstannyŋ sybailas jemqorlyqty qabyldau jahandyq indeksındegı pozisiiasy tömendedı. 2025 jyldyŋ qorytyndysy boiynşa elımız 100 baldyŋ ışınde 38 ball jinady. Būl turaly Transparency International Kazakhstan jazdy, dep habarlaidy «Adyrna» tılşısı.
Halyqaralyq ūiym 2025 jylǧa arnalǧan jyl saiynǧy Sybailas jemqorlyq indeksın jariialady. Būl reitingke 182 el men aumaq kırgen. İndeks sarapşylar men biznes qauymdastyǧynyŋ baǧalaularyna negızdelıp, memlekettık sektordaǧy sybailas jemqorlyq deŋgeiın qabyldau körsetkışın 0-den 100-ge deiıngı şkala boiynşa ölşeidı.
«İndeks ärtürlı elderdegı sybailas jemqorlyq deŋgeiın baǧalau jäne salystyru üşın negızgı halyqaralyq qūral bolyp qala beredı», – delıngen habarlamada.
2025 jyldyŋ qorytyndysy boiynşa Qazaqstan 38 ball jinap, 182 eldıŋ ışınde 96-orynǧa tūraqtady. Būl ötken jylmen salystyrǧanda 2 ballǧa tömen.
Elımız ball sany boiynşa Efiopiia jäne Surinam elderımen bır qatarda, al Kolumbiia, Dominikan Respublikasy, Gambiia, Lesoto men Zambiiadan bır saty joǧary, Maldiv, Marokko men Tunisten bır oryn tömen tūr.
Transparency International mälımetınde reitingtegı orynnan görı jinaǧan ball maŋyzdyraq ekenı atap ötıldı.
«50 baldan tömen nätije alǧan elder sybailas jemqorlyq deŋgeiı joǧary memleketter qataryna jatady. Şyǧys Europa jäne Ortalyq Aziia öŋırınde būl mejeden tek Gruziia (50 ball) ǧana öttı. Qazaqstandy (38 ball) körşı eldermen salystyrsaq: Özbekstan — 31 ball (124-oryn); Qyrǧyzstan — 26 ball (142-oryn); Resei — 22 ball (157-oryn); Türıkmenstan — 17 ball (167-oryn). Şyǧys Europa jäne Ortalyq Aziia öŋırı 100 baldyq şkala boiynşa ortaşa eseppen 34 ball jinady. 19 eldıŋ altauynda körsetkış tömendese, tek jetı elde ǧana oŋ dinamika baiqaldy. Būl reformalardyŋ baiaulaǧanyn jäne instituttardyŋ älsızdıgın körsetedı», - dep tolyqtyrǧan Transparency International Kazakhstan.
