شىمكەنت قالاسىندا ءبىر وتباسىنىڭ ءۇش مۇشەسى پاتەردەن ءولى كۇيىندە تابىلدى، دەپ حابارلايدى “ادىرنا” ۇلتتىق پورتالى Otyrar.kz-كە سىلتەپ.
«شىعىس» شاعىناۋدانىنداعى پاتەرلەردىڭ بىرىنەن ءبىر وتباسىنىڭ ءۇش مۇشەسىنىڭ ءمايىتى تابىلدى.
اقپاراتتى قالالىق توتەنشە جاعدايلار دەپارتامەنتى راستادى. قۇتقارۋ قىزمەتىن مارقۇمداردىڭ كورشىلەرى شاقىرعان.
ۆەدومستۆونىڭ مالىمەتىنشە، 8 اقپان كۇنى ساعات 16:36-دا 112 پۋلتىنە ءبىر پاتەر تۇرعىندارىنىڭ ۇزاق ۋاقىت بويى بايلانىسقا شىقپاي، ەسىك اشپاعانى جونىندە حابارلاما تۇسكەن.
وقيعا ورنىنا جەدەل-قۇتقارۋ جاساعى جىبەرىلگەن. ەسىكتى اشقاننان كەيىن پاتەر ىشىنەن ءۇش ادامنىڭ ءمايىتى تابىلعان. قازىرگى تاڭدا وقيعا ورنىندا ءتيىستى قىزمەت وكىلدەرى جۇمىس ىستەپ جاتىر.
الدىن الا مالىمەت بويىنشا، قايعىلى جاعداي تابيعي گازدان ۋلانۋ سالدارىنان بولۋى مۇمكىن. كۇش قولدانۋ بەلگىلەرى انىقتالماعان. قازىرگى ۋاقىتتا وقيعانىڭ بارلىق ءمان-جايى انىقتالۋدا.
