اكەمىز قاينار ولجاي "دەر كەزىندە دەۋ كەرەك" دەپ پرينتسيپشىلدىك پەن ازاماتتىق تانىتتى. كەشە مەن ىستەر كەزىندە ىستەپ كوردىم. وعان دەيىن ءبىرشاما ە-ءوتىنىش جازىلعان بولاتىن، بىراق كەشە ازىرگە اتتارىن ايتپاي-اق قويايىن، كەسىرىم ءتيىپ كەتەر، كوميسسيا مۇشەلەرىنە تىكەلەي حابارلاسىپ، فورمۋليروۆكا بويىنشا ۇسىنىس جەتكىزىپ، ولار سول ۇسىنىستى ەنگىزگەنىن حابارلادى. ەگەر وتكىزە الساق، ال ول وتەتىن سياقتى، قورىتىندى پوستتا ول قاھارمانداردى اشىپ ايتامىن.
اسپانداعى پروتسەستەردىڭ شەت جاعاسىن بىلەتىن ادام رەتىندە ءدال قازىر 9 باپتان 2 تارماقتى المايتىنىن ءتۇسىنىپ وتىرمىن. بىراق داۋلى تارماقتى ءسال مودەرنيزاتسيالاپ جىبەرۋگە ەشكىم قارسى ەمەس. تارماقتا ەگەر ءبارى سوعان تىرەلىپ تۇرسا ورىس ءتىلى دەگەن ءسوزدى قالدىرامىز، بىراق وعان قاتىستى "رەسمي" جانە "تەڭ" دەگەن فورمۋليروۆكالاردى "قاجەت بولعان جاعدايدا" جانە "قوسىمشا" فورمۋليروۆكالارىنا اۋىستىرۋدى ۇسىندىق.
بيلىك ءۇشىن بۇل ساياسي كورەگەندىلىك جانە ازاماتتار ۇسىنىسىنا دا قۇلاق اسۋدى بىلدىرەدى. بۇل الداعى بىرنەشە تاۋەكەلدىڭ الدىن الادى. سوسىن ورىس ءتىلىن قازاق ءتىلىنىڭ مەملەكەتتىك ستاتۋسىنا تەڭەستىرىپ، جاڭىلىسىپ جۇرگەندەرگە ۇعىم شەكارالارىن ايقىنداپ بەرەدى. ازىرگە كەرەگى سول. ءبىزدى قۇرتىپ تۇرعانى رەسمي مەن تەڭ دەگەن ۇعىمدار ەدى.
مەن ۇسىنعان، جانە اتپال ازاماتتار ارقىلى كوميسسيا قابىلداپ، ەندى قاراستىرىپ جاتقان نۇسقاسى مىناداي:
9-باپ
1. قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى.
2. مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا قاجەت بولعان جاعدايدا قازاق تىلىنە قوسىمشا ورىس ءتىلى قولدانىلادى.
3. مەملەكەت ءبىرتۇتاس قازاقستان حالقىنىڭ تىلدەرىن ۇيرەنۋ جانە دامىتۋ ءۇشىن جاعداي جاساۋعا قولداۋ كورسەتەدى.
ەندى بارلىعى ۋاقىت پەن كوميسسيا مۇشەلەرىنىڭ ەنشىسىندە. امانات قيانات كورمەي ءوز ورنىن تاپسا، ەرتەڭ نەمەرەلەرىمنىڭ كوزىنە ادال قاراي الاتىن بولامىن.
