امەريكالىق Washington Post گازەتى سارسەنبى كۇنى بىرنەشە ءبولىم قىزمەتكەرلەرىن قامتيتىن اۋقىمدى قىسقارتۋلار بولاتىنىن مالىمدەدى. ەڭ كوپ قىسقارتۋ سپورت جانە جەرگىلىكتى جاڭالىقتار بولىمدەرىنە، سونداي-اق حالىقارالىق تىلشىلەر جەلىسىنە قاتىستى بولادى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
Washington Post — اقش-تاعى بۇرىننان كەلە جاتقان جەتەكشى باسىلىمداردىڭ ءبىرى. 2013 جىلى گازەتتى Amazon كومپانياسىنىڭ نەگىزىن قالاۋشى ميللياردەر دجەفف بەزوس ساتىپ العان. 2017 جىلى دونالد ترامپتىڭ پرەزيدەنتتىك كەزەڭى باستالعان كەزدە باسىلىم Democracy Dies in Darkness («دەموكراتيا قاراڭعىلىقتا ولەدى») دەگەن ۇرانمەن جارىق كورە باستادى.
گازەتتىڭ اتقارۋشى رەداكتورى مەتت ماررەيدىڭ ايتۋىنشا، بۇل قىسقارتۋلار باسىلىمنىڭ تۇراقتىلىعىن قامتاماسىز ەتۋى ءتيىس.
«بۇل — قيىن شەشىم. ەگەر ءبىز تەك امان قالۋدى ەمەس، دامۋدى قالاساق، جۋرناليستيكامىزدى جانە بيزنەس مودەلىمىزدى جاڭاشا قالىپتاستىرىپ، جاڭا ماقساتتار قويۋىمىز قاجەت»،-دەپ
الايدا باسىلىم قىزمەتكەرلەرى مەن كەيبىر ەكس-باسشىلار بۇل قادامدى قاتاڭ سىنعا الدى.
2021 جىلعا دەيىن باس رەداكتور قىزمەتىن اتقارعان مارتي بارون بۇل جاعدايدى «الەمدەگى ەڭ ۇلى جاڭالىق ۇيىمدارىنىڭ ءبىرى تاريحىنداعى ەڭ قارالى كۇندەردىڭ ءبىرى» دەپ اتادى.
قىسقارتۋلاردىڭ سەبەبىن تۇسىندىرە وتىرىپ ماررەي سوڭعى ءۇش جىلدا جاساندى ينتەللەكتتىڭ قارقىندى دامۋى اياسىندا باسىلىمنىڭ ينتەرنەتتەگى ترافيگى كۇرت تومەندەگەنىن ايتتى.
ء«بىز ءجيى ءبىر عانا كوزقاراسپەن — اۋديتوريانىڭ ءبىر عانا بولىگى ءۇشىن جازامىز»، — دەپ قوستى ول.
ونىڭ ايتۋىنشا، بۇدان بىلاي Washington Post باسىلىمى ساياسات، ۇلتتىق قاۋىپسىزدىك، جۋرناليستىك زەرتتەۋلەر، سونداي-اق دەنساۋلىق پەن ءال-اۋقاتقا قاتىستى تاقىرىپتاردى جاريالاۋعا باسىمدىق بەرەدى.
قىسقارتىلاتىن قىزمەتكەرلەر سانى رەسمي تۇردە جاريالانعان جوق. الايدا New York Times باسىلىمىنىڭ ەكى دەرەككوزىنە سۇيەنسەك، Washington Post كوممەرتسيالىق بولىمدەردى قوسا العاندا شتاتتىڭ شامامەن 30 پايىزىمەن قوشتاسادى. NYT مالىمەتىنشە، شامامەن 800 ءجۋرناليستىڭ 300-دەن استامى جۇمىستان كەتەدى.
ەسكە سالايىق، گازەت 2024 جىلى اقش-تاعى پرەزيدەنت سايلاۋى قارساڭىندا ەشبىر كانديداتقا قولداۋ بىلدىرمەيتىنىن جاريالاعاننان كەيىن ونداعان مىڭ جازىلۋشىسىنان ايىرىلدى. بۇل شەشىمدى باسىلىم يەسى دجەفف بەزوس قابىلداعان.
