افريكادا ءشول دالادا اۋىر جۇك تاسىمالداۋعا ارنالعان العاشقى تەمىرجول اشىلدى. بۇل تۋرالى Xinhua اگەنتتىگى جازدى، دەپ حابارلايدى «ادىرنا» ءتىلشىسى.
ء«الجيردىڭ باتىس تەمىرجولى – افريكاداعى ءشول ارقىلى اۋىر جۇك تاسىمالداۋعا ارنالعان العاشقى تەمىرجول جەلىسى قوزعالىسقا اشىلدى. بۇل جوبا ءالجيردىڭ ۇلتتىق تەمىرجول جەلىسىن جەتىلدىرۋگە مۇمكىندىك بەرىپ، ەلدىڭ وڭتۇستىك-باتىس وڭىرلەرىندەگى كولىك قاتىناسى مەن ەكونوميكانىڭ دامۋىنا ىقپال ەتەدى»،- دەلىنگەن حابارلامادا.
ەل پرەزيدەنتى ابدەلمادجيد تەببۋن ءالجيردىڭ وڭتۇستىك-باتىسىنداعى بەشار پروۆينتسياسىندا وتكەن سالتاناتتى راسىمدە تەمىرجول جەلىسىنىڭ رەسمي تۇردە پايدالانۋعا بەرىلگەنىن جاريالادى.
ۇزىندىعى 950 شاقىرىم بولاتىن بۇل جولدىڭ 575 شاقىرىمى قىتايدىڭ تەمىرجول قۇرىلىس كورپوراتسياسى (CRCC) مەن ءالجيردىڭ مەملەكەتتىك كومپانيالارى تاراپىنان سالىنعان. بۇل – الجيردە قىتايلىق كومپانيا جۇزەگە اسىرعان ەڭ ءىرى ينفراقۇرىلىمدىق جوبا.
ساحارا ءشولىنىڭ كۇردەلى جاعدايىندا 8 مىڭنان استام قىتايلىق جانە الجيرلىك جۇمىسشى جوبانىڭ قۇرىلىسىن 24 ايدىڭ ىشىندە اياقتاپ، جەرگىلىكتى تەمىرجول قۇرىلىسى سالاسىندا ايتارلىقتاي جەتىستىكتەرگە جەتىپ، جاڭا رەكوردتار ورناتتى.
جەرگىلىكتى باق مالىمەتىنشە، بۇل تەمىرجول جىلىنا 50 ميلليون توننا تەمىر كەنىن تاسىمالداۋعا مۇمكىندىك بەرەدى. سونىمەن قاتار جولاۋشىلار تاسىمالىنا دا قىزمەت كورسەتىپ، جول بويىنداعى تۇرعىندارعا قولايلى جاعداي جاساماق.
