ىشكى ىستەر ءمينيسترى ەرجان سادەنوۆ ءىىم باسقارۋ اكادەمياسى بازاسىندا اشىلعان ۇشقىشسىز ۇشۋ اپپاراتتارى وپەراتورلارىن دايارلاۋعا ارنالعان مامانداندىرىلعان زەرتحانا مەن پوليگوننىڭ جۇمىسىمەن تانىستى، دەپ حابارلايدى «ادىرنا» ءتىلشىسى.
«جاڭا زەرتحانانىڭ باستى ەرەكشەلىگى - FPV-دروندارمەن جۇمىس ىستەۋدىڭ تولىق تسيكلىن قامتۋى. مۇندا 3D-پرينتەرلەردى پايدالانا وتىرىپ بولشەكتەردى جوبالاۋ جانە دايىنداۋدان باستاپ، درونداردى قۇراستىرۋ، تەحنيكالىق باپتاۋ جانە سىناقتان وتكىزۋگە دەيىنگى بارلىق كەزەڭدەر جۇزەگە اسىرىلادى. بۇل ءتاسىل تىڭداۋشىلارعا تەك پيلوتتاۋ داعدىلارىن مەڭگەرىپ قانا قويماي، FPV-درونداردىڭ قۇرىلىمىن، جۇمىس ىستەۋ قاعيداتتارىن جانە پايدالانۋ ەرەكشەلىكتەرىن تەرەڭ تۇسىنۋگە مۇمكىندىك بەرەدى»،-دەلىنگەن حابارلامادا.
قۇرىلعان پوليگون وپەراتورلاردى پراكتيكالىق تۇرعىدا دايارلاۋعا ارنالعان. وندا ۇشقىشسىز اپپاراتتاردى باسقارۋ داعدىلارى، مانەۆر جاساۋ جانە شىنايى جەدەل وقيعالارعا بارىنشا جاقىنداتىلعان ورتادا وقۋ تاپسىرمالارىن ورىنداۋ پىسىقتالادى.
ماتەريالدىق-تەحنيكالىق بازامەن قاتار ءىىم باسقارۋ اكادەمياسىندا ۇۇا وپەراتورلارىن دايارلاۋدىڭ مامانداندىرىلعان كۋرستار جۇيەسى ەنگىزىلگەن. اتاپ ايتقاندا، Ashyq Aspan Foundation قورىمەن بىرلەسىپ ازىرلەنگەن وقىتۋدىڭ ەكىنشى كەزەڭى جۇزەگە اسىرىلۋدا. بۇل كەزەڭ تەرەڭدەتىلگەن پراكتيكالىق دايارلىققا، FPV-دروندارمەن جۇمىس ىستەۋگە جانە كۇردەلى جاعدايلاردا شەشىم قابىلداۋ داعدىلارىن دامىتۋعا باعىتتالعان.
ءىس-شارادا ۇشقىشسىز ۇشۋ اپپاراتتارىن باسقارۋ بويىنشا مامانداردى دايارلاۋ جۇيەسىن ودان ءارى دامىتۋ پەرسپەكتيۆالارى، سونداي-اق ىشكى ىستەر ورگاندارى قىزمەتىندە ۇشقىشسىز تەحنولوگيالاردى قولدانۋ اياسىن كەڭەيتۋ ماسەلەلەرى تالقىلاندى.
