18 جاستاعى ساربازدىڭ تۇسىنىكسىز ءارى قورقىنىشتى ارەكەتى قازنەتتى شۋلاتتى. ساربازدىڭ ارەكەتىنە پسيحولوگ مامان مەن يمام باعاسىن بەردى، دەپ حابارلايدى "ادىرنا" ۇلتتىق پورتالى "استانا" ارناسىنا سىلتەمە جاساپ.
اينالاسىن ۇركىتىپ-شوشىتىپ جاتقان ساربازدىڭ مۇنداي ارەكەتى ءبىرىنشى رەت بولماعان سەكىلدى. الەۋمەتتىك جەلىدە تاراعان ۆيدەودان دا مۇنى اڭعارۋ وڭاي. بەلگىلى بولعانداي ساربازدىڭ ەسىمى سايات. اسكەر قاتارىنا الىنعانىنا 1 ايداي ۋاقىت بولعان. ول ۇلتتىق قاۋىپسىزدىك كوميتەتىنىڭ شەكارا اسكەرلەرىنىڭ سابىندا. بەينەجازبادا قاسىنداعى جاس ساربازدىڭ قۇران اياتتارىن وقىعاننان كەيىن ەرسى قىلىقتارىن تىيىپ، تالىپ قالاتىنىن كورۋگە بولادى. جىن شىعارۋ ىسىمەن 5 جىلدان بەرى اينالىساتىن دانيار يبراحيمۇلىنىڭ ايتۋىنشا، جىن كىرگەن بولۋى مۇمكىن.
- كەيبىر سيقىرلانعان، جىن كىرگەن ادام وسىنداي جاعدايدا بولادى. ول جىننىڭ ارەكەتى باسىندا باقىرىپ-شاقىرىپ، جانىنداعى ادامداردى قورقىتۋعا تىرىسادى. وسى ۆيدەودان سونى اڭعارىپ وتىرمىز. سونداي شايتاننىڭ اسەرى بارى كورىنىپ تۇر، - دەيدى شەيح كۋنتا قاجى مەشىتىنىڭ نايب يمامى دانيار يبراحيمۇلى.
ءدىني قىزمەتكەردىڭ، تاعى ءبىر نۇسقاسى بار. سارباز قورىققانىنان وسىنداي امالدى قولدانعان بولۋى دا مۇمكىن. بىراق، كەسىپ ايتۋعا بولمايدى دەپ قوستى. ونىڭ انىق-قانىعىن ءبىلۋ ءۇشىن جەكە جۇمىس ىستەۋ كەرەك.
ال پسيحولوگ جاس ساربازدىڭ پسيحيكالىق اقاۋى بولۋى مۇمكىن دەپ وتىر. اسكەرگە شاقىرعاندا دارىگەرلەر ونى مەديتسينالىق تەكسەرۋدەن دۇرىس وتكىزبەگەن دەپ ەسەپتەيدى ول.
- دارىگەرلەر اسكەر قاتارىنا الىناتىن جىگىتتەردى ىرىكتەۋ كەزىندە تولىققاندى تەكسەرۋى شارت. ەگەر سونداي وزگەرىس بولسا سول جەردە انىقتالادى عوي، پسيحياتردىڭ باقىلاۋى كەرەك ەدى. بۇل جۇمىستىڭ شالالىعىن بىلدىرەدى. قازىر قازاقستاندا كادر جەتىسپەيدى. سونىڭ ىشىندە اسكەري ادامدار. سوندىقتان بولار، دەنساۋلىعى جاراسا دا، جاراماسا دا الىپ كەتۋگە تىرىسادى،- دەيدى پسيحولوگ ۆلاديسلاۆ سميرنوۆ.
ايتا كەتەيىك، ۆيدەونى كورگەن حالىق جاعاسىن ۇستادى. كەيبىرى، اسكەري بولىمدەگى مامانداردى كىنالاسا، اتا-انالار بالالارىن اسكەرگە جىبەرگىسى كەلمەي وتىر.
"ادىرنا" ۇلتتىق پورتالى
