قازاقستاننىڭ باس پروكۋراتۋراسى شەشەن بەلسەندىسى مانسۋر موۆلاەۆتى رەسەيگە ەكستراديتسيالاۋعا كەلىسىم بەردى. بۇل تۋرالى الەۋمەتتىك جەلىلەردە زاڭگەر مۇرات ادام مالىمدەدى، دەپ حابارلايدى “ادىرنا”.
«بۇگىن قازاقستان رەسپۋبليكاسىنىڭ باس پروكۋراتۋراسىنان جامان حابار الدىق: ولار رەسەي فەدەراتسياسىنىڭ باس پروكۋراتۋراسىنىڭ شەشەن وپپوزيتسيونەرى ءارى بەلسەندىسى مانسۋر موۆلاەۆتى بەرۋ تۋرالى ەكستراديتسيالىق سۇراۋىن قاناعاتتاندىرۋعا شەشىم قابىلدادى»، – دەپ جازدى زاڭگەر.
وتكەن جىلدىڭ جەلتوقسان ايىنىڭ سوڭىندا قازاقستان بيلىگى موۆلاەۆقا بوسقىن مارتەبەسىن بەرۋدەن باس تارتقان. قازىر بۇل شەشىم سوتتا داۋلانىپ جاتىر، الدىن الا سوت تىڭداۋى 11 اقپانعا بەلگىلەنگەن.
قازىرگى ۋاقىتتا مانسۋر موۆلاەۆ الماتىداعى تەرگەۋ يزولياتورىندا (سيزو) وتىر.
سونىمەن قاتار، بەلسەندىنىڭ قولداۋ توبى Instagram جەلىسىندە قازاقستان باس پروكۋراتۋراسىنان الىنعان قۇجاتتىڭ كوشىرمەسىن جاريالادى. قۇجاتتا ەكستراديتسيا تۋرالى شەشىم زاڭدى كۇشىنە ەنگەننەن كەيىن 30 تاۋلىك ىشىندە موۆلاەۆتى رەسەيگە تاپسىرۋ مىندەتى كورسەتىلگەن.
قۇقىق قورعاۋشىلار بۇل شەشىمدى زاڭسىز دەپ اتاپ وتىر، سەبەبى بەلسەندىنىڭ «باسپانا الۋ جونىندەگى سوت پروتسەستەرى ءالى ءجۇرىپ جاتىر». سونداي-اق ولار رەسەيدە ونى «100 پايىز ىقتيمالدىقپەن ولتىرەدى» دەپ مالىمدەيدى.
مانسۋر موۆلاەۆ شەشەنستان باسشىسى رامزان قادىروۆتى قاتاڭ سىناۋىمەن، سونداي-اق رەسپۋبليكاداعى ادام قۇقىقتارىنىڭ بۇزىلۋى مەن ساياسي رەپرەسسيالارعا قارسى ءسوز سويلەۋىمەن تانىمال.
2020 جىلى بەلسەندى رەسەي قىلمىستىق كودەكسىنىڭ 228-بابى (ەسىرتكى زاتتارىنىڭ زاڭسىز اينالىمى) بويىنشا ءۇش جىلعا باس بوستاندىعىنان ايىرىلعان. شەشەن وپپوزيتسيونەرلەرىنىڭ ايتۋىنشا، بۇل ءىس جالعان قۇراستىرىلعان.
2022 جىلى موۆلاەۆ شارتتى تۇردە مەرزىمىنەن بۇرىن بوساتىلعان، الايدا كوپ ۇزاماي ونى ۇرلاپ، شەشەنستانداعى اۋداندىق ىشكى ىستەر بولىمدەرىنىڭ بىرىنە جەتكىزگەن. ۇستالعان ادام قاشىپ شىعىپ، قۇجاتسىز قىرعىزستانعا جەتكەن. وسىدان كەيىن رەسەي ونى ەكسترەميزمدى قارجىلاندىردى دەگەن ايىپپەن فەدەرالدىق ىزدەۋگە جاريالاعان.
قىرعىزستاندا موۆلاەۆ شەكارانى زاڭسىز كەسىپ وتكەنى ءۇشىن تۇرمەدە جازاسىن وتەپ، ەلدەن شىعارىلۋى ءتيىس بولعان، الايدا ول ءوز بەتىمەن ەلدەن كەتىپ ۇلگەرگەن.
2025 جىلدىڭ مامىر ايىندا بەلسەندى رەسەيدىڭ سۇراۋى بويىنشا قازاقستاندا ۇستالدى. الدىمەن ول 40 تاۋلىككە قاماۋعا الىندى، كەيىن بۇل قاماۋ مەرزىمى بىرنەشە رەت ۇزارتىلدى.
