كونستيتۋتسيالىق رەفورمالار – الەمدىك گەوساياسي احۋال تالاپتارىن ەسكەرە وتىرىپ، مۇمكىندىكتەردى ءتيىمدى پايدالانۋ ارقىلى دامۋدىڭ تىڭ باعىتىن تاڭداۋ. بۇل تۋرالى كونستيتۋتسيالىق كوميسسياسىنىڭ مۇشەسى، «AMANAT» پارتياسى قاراعاندى وبلىستىق فيليالىنىڭ توراعاسى بەكزات التىنبەكوۆ مالىمدەدى.
التىنبەكوۆتىڭ ايتۋىنشا، ءاربىر وزگەرىستىڭ ءوز مازمۇنى مەن ماڭىزى بار. بۇل قادام – سانانىڭ جاڭعىرعانىن كورسەتەتىن نەگىزگى قۇبىلىس.
«قىزىلوردادا وتكەن ۇلتتىق قۇرىلتايدىڭ V وتىرىسىندا كۇن تارتىبىنە مۇلدە تىڭ باستامالار كوتەرىلىپ، بولاشاقتىڭ جارقىن باعدارى ناقتىلاندى. قۇرىلتاي وتىرىسىندا مەملەكەت باسشىسى قاسىم-جومارت توقاەۆ «قازاقستان حالقى اسسامبلەياسى مەن ۇلتتىق قۇرىلتايدىڭ تاريحي ءمان-ماڭىزى زور ءارى ايرىقشا جاۋاپتى ميسسيالارى تابىستى اياقتالدى دەپ ساناۋعا بولادى. ەندى جاڭا ينستيتۋت رەتىندە قازاقستاننىڭ حالىق كەڭەسىن قۇرۋدى ۇسىنامىن»، – دەپ، تاريحي مالىمدەمە جاسادى. ال، كونستيتۋتسيالىق رەفورما جونىندەگى كوميسسيانىڭ مۇشەسى رەتىندە مەن وسى حالىق كەڭەسىنىڭ قۇقىقتىق مۇمكىندىكتەرى مەن قىزمەتى اتا زاڭىمىزدىڭ جاڭا رەداكتسياسىندا جان-جاقتى ناقتىلانۋ كەرەك دەپ سانايمىن»، – دەدى ول ءوز سوزىندە.
سونىمەن قاتار كوميسسيا مۇشەسى بىرقاتار ۇسىنىستارعا باسا نازار اۋداردىپ، قولداۋىن ءبىلدىردى. ولار – «قازاقستان رەسپۋبليكاسىنىڭ حالىق كەڭەسى قر حالقىنىڭ مۇددەلەرىن قورعايتىن جوعارى كونسۋلتاتيۆتىك ورگان بولىپ تابىلادى» مەن «قازاقستان رەسپۋبليكاسىنىڭ حالىق كەڭەسىنىڭ قۇرامى قازاقستان رەسپۋبليكاسى ازاماتتارىنان جاساقتالادى» دەگەن نورمالارعا بايلانىستى.
«ورتاعا سالىنعان ۇسىنىستاردى قولدايمىن. جاڭعىرۋ داۋىرىندە اسا زور تاريحي ميسسيانى اتقارۋعا قر حالىق كەڭەسىنىڭ قىزمەتى مەن وكىلەتتىگى، قۇقىعى مەن مىندەتتەرى وسىلايشا اتا زاڭىمىزدا ناقتىلانعان جاعدايدا عانا ونىڭ قىزمەتى باياندى دا ناتيجەلى بولارى ءسوزسىز. ازىرگە مەنىڭ ۇسىنىسىم – وسى»، – دەپ اياقتادى التىنبەكوۆ.
