تاراز قالاسىندا «زاڭ مەن ءتارتىپ» پروفيلاكتيكالىق كەرۋەنى اياسىندا قالالىق فورۋم ۇيىمداستىرىلدى. ءىس-شارانىڭ ماقساتى – قۇقىق بۇزۋشىلىقتىڭ الدىن الۋ، تۇرعىنداردىڭ قۇقىقتىق ساۋاتتىلىعىن ارتتىرۋ جانە پروفيلاكتيكالىق ءتۇسىندىرۋ جۇمىستارىن كۇشەيتۋ بولىپ تابىلادى.
ءىس- شارا مودەراتورى، پد پسيحولوگى ايجان تۇكتىباەۆا فورۋمنىڭ ماڭىزىنا توقتالىپ، جاستارعا جيىننىڭ بەرەر ءتالىمى مول ەكەنىن اتاپ ءوتتى. 
كەزدەسۋگە تاراز قالاسى اكىمىنىڭ ورىنباسارى ۋلانا سلامبەكوۆا، قالا پروكۋرورى نۇرجان بورانباەۆ، تاراز قالاسى پوليتسيا باسقارماسىنىڭ باستىعى ارداق ماديماروۆ، ءبىلىم بەرۋ مەكەمەلەرىنىڭ قىزمەتكەرلەرى، جوعارى وقۋ ورىندارىنىڭ ستۋدەنتتەرى مەن جاستار قاتىستى.
كەزدەسۋ بارىسىندا جامبىل وبلىسى پد كيبەرقىلمىسقا قارسى ءىس-قيمىل باسقارماسىنىڭ اعا جەدەل ۋاكىلى مۇحاممەد قوشماعانبەتوۆ ينتەرنەت-الاياقتىق پەن كيبەربۋللينگكە قارسى كۇرەس جولدارىن ءتۇسىندىردى. سونىمەن قاتار، وتباسىلىق-تۇرمىستىق زورلىق-زومبىلىققا قارسى كۇرەس ءبولىمىنىڭ باستىعى ديليافرۋز كينجەحانوۆا وتباسىنداعى زورلىق-زومبىلىقتىڭ الدىن الۋ جانە كومەك كورسەتۋ شارالارى تۋرالى باياندادى.
سونداي-اق، ەكسترەميزمگە قارسى ءىس-قيمىل باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى زاريفجان يۋسۋپوۆ راديكالدى يدەولوگيا مەن ءدىني اعىمداردىڭ دۇرىس جەتكىزىلۋىن قاداعالاۋ ماسەلەلەرىنە توقتالدى، ال ەسىرتكى قىلمىسىنا قارسى ءىس-قيمىل باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى ايگەرىم كاۋكەشوۆا ەسىرتكىگە تاۋەلدىكتەن قالاي ساقتانۋ، قىلمىس قۇربانى بولماۋ جولدارى تۋرالى اقپارات بەردى.
فورۋم بارىسىندا قالا تۇرعىنى ءسوز سويلەپ، مۇنداي كەزدەسۋلەردىڭ ماڭىزدىلىعىن اتاپ ءوتتى. ول ءتارتىپ، تاربيە مەن مادەنيەت ءوزارا ساباقتاسىپ، قوعام مەن قۇقىق قورعاۋ ورگاندارى بىرلەسە ارەكەت ەتۋى عانا قاۋىپسىز ورتانى قالىپتاستىرادى دەپ ويىن جەتكىزدى.
جيىنعا قاتىسۋشىلارعا اسىرەسە، كينولوگ ماماندارىنىڭ قىزمەتتىك يتتەردىڭ كومەگىمەن قىلمىستاردى اشۋ ءادىس-تاسىلدەرىن ساحنالاپ كورسەتۋى ەرەكشە اسەر سىيلادى.
كەزدەسۋ سوڭىندا ءموبيلدى توپ كەرۋەن اۆتوبۋسىمەن قالا كوشەلەرىن ارالاپ، داۋىس زورايتقىش ارقىلى اتالعان باعىتتاردا ەسكەرتۋ ۇندەۋلەرىن جاسادى.
«زاڭ مەن ءتارتىپ» پروفيلاكتيكالىق كەرۋەنى الداعى ۋاقىتتا دا ءوڭىر اۋماعىندا جالعاساتىن بولادى.
