تەڭىز كەن ورىنداعى ءوندىرىس قايتا جانداندى. بۇل تۋرالى «تەڭىزشەۆرويل» كومپانياسى مالىمدەدى، دەپ حابارلايدى "ادىرنا".
كومپانيا ەلەكتر جۇيەسىن قاۋىپسىز ىسكە قوسقانىن جانە مۇناي ءوندىرۋدىڭ العاشقى كەزەڭى باستالعانىن راستادى. مۇناي كولەمىن ارتتىرۋ جۇيەلەردىڭ دايىن بولۋى جانە وندىرىستىك جاعدايلارعا قاراي بىرتىندەپ جۇرگىزىلەتىن بولادى. الايدا تشو قاي كەن ورنىندا ءوندىرىس قايتا باستالعانىن ناقتىلاعان جوق.
«تەڭىزشەۆرويل» (تشو) ەلەكتر ەنەرگياسىن تاراتۋ جۇيەسىنىڭ قاۋىپسىز ىسكە قوسىلعانىن جانە شيكى مۇنايدىڭ باستاپقى ءوندىرۋ جۇمىستارىنىڭ قايتا باستالعانىن راستايدى. تشو مۇمكىندىككە قاراي ءوندىرىس كولەمىن كەزەڭ-كەزەڭىمەن ارتتىرۋ ۇستىندە. تشو قاۋىپسىز ءارى سەنىمدى ءوندىرىستى قامتاماسىز ەتۋ قاعيداتتارىنا ادال بولىپ قالا بەرەدى. بۇدان وزگە تشو ءوز وندىرىستىك قىزمەتىنىڭ ەگجەي-تەگجەيلەرىنە تۇسىنىكتەمە بەرمەيدى»، – دەلىنگەن حابارلامادا.
ەسكە سالساق، 18 قاڭتاردا «تەڭىزشەۆرويل» مۇناي كومپانياسىنىڭ اتىراۋ وبلىسى جىلىوي اۋدانىندا ورنالاسقان زاۋىت ترانسفورماتورىنان ءورت شىعىپ، جۇزدەگەن جۇمىسشى ەۆاكۋاتسيالاندى. ءورت جەدەل سوندىرىلگەن، زارداپ شەككەندەر جوق. سونىڭ سالدارىنان «تەڭىز» جانە «كورولەۆ» مۇناي كەن ورىندارىندا مۇناي ءوندىرۋ ۋاقىتشا توقتاعان بولاتىن.
