جاپونيا 15 جىلدان كەيىن الەمدەگى ەڭ قۋاتتى «كاسيۆادزاكي–كاريۆا» اتوم ەلەكتر ستانتسياسىنىڭ جۇمىسىن قايتا جانداندىردى. الايدا بىرنەشە ساعاتتان كەيىن ونىڭ جۇمىسى ۋاقىتشا توقتاتىلدى، دەپ حابارلايدى «ادىرنا» ءتىلشىسى.
Tokyo Electric Power Co. Holdings كومپانياسىنىڭ اەس جۇمىسىن ءىشىنارا قايتا باستاۋ تۋرالى شەشىم جەرگىلىكتى تۇرعىنداردىڭ قاۋىپسىزدىككە قاتىستى الاڭداۋشىلىعىنا قاراماستان قابىلدانعان.
2025 جىلدىڭ جەلتوقسانىندا نيگاتا پرەفەكتۋراسىنىڭ بيلىگى №6 جانە №7 رەاكتورلاردى قايتا ىسكە قوسۋعا كەلىسىم بەرگەن. سونىڭ ىشىندە №6 رەاكتور 20 قاڭتاردا ىسكە قوسىلعان. الايدا ىسكە قوسۋ ءراسىمى كەزىندە دابىل سيگنالى بەرىلىپ، بىرنەشە ساعاتتان كەيىن ونىڭ جۇمىسى ۋاقىتشا توقتاتىلعان. TEPCO وكىلدەرى رەاكتوردىڭ تۇراقتى كۇيدە ەكەنىن جانە قورشاعان ورتاعا ەشقانداي راديواكتيۆتى اسەر بولماعانىن مالىمدەدى. الايدا ونىڭ قاشان قايتا ىسكە قوسىلاتىنى ازىرگە حابارلانعان جوق.
رەاكتوردىڭ قۋاتى – شامامەن 1,35 گۆت. TEPCO كومپانياسى ءبىر اپتا ىشىندە ونىڭ مۇمكىن قۋاتىنىڭ شامامەن جارتىسىنا جەتۋدى جوسپارلاعان، كەيىن تولىق قۋاتتا جۇمىس ىستەۋى ءۇشىن ينسپەكتسيا جۇرگىزۋ ماقساتىندا رەاكتوردى ۋاقىتشا توقتاتۋ كوزدەلگەن. كومپانيا رەاكتوردى كوممەرتسيالىق پايدالانۋعا 2026 جىلدىڭ اقپانىندا بەرۋدى جوسپارلاپ وتىر.
ال №7 رەاكتوردى ىسكە قوسۋ 2030 جىلعا قاراي عانا مۇمكىن بولۋى ىقتيمال، سەبەبى ونىڭ اۋماعىندا نورماتيۆتىك تالاپتارعا ساي قورعانىس نىسانىنىڭ قۇرىلىسى ءجۇرىپ جاتىر. ال اەس-تەگى قالعان بەس ەنەرگوبلوكتى مۇلدە پايدالانۋدان شىعارۋ جوسپارلانۋى مۇمكىن.
ايتا كەتەيىك، «كاسيۆادزاكي–كاريۆا» اەس-ءى جاپون تەڭىزىنىڭ جاعالاۋىندا ورنالاسقان. جەتى رەاكتورىنىڭ جالپى قۋاتى 8,2 مىڭ مۆت-تان اساتىن بۇل ستانتسيا الەمدە ءبىرىنشى ورىندا تۇر. جاپونيا ۇكىمەتى جاڭا اەس سالۋدان باس تارتۋدى كوزدەيتىن بۇرىنعى ساياساتىن قايتا قاراپ، 2011 جىلى «فۋكۋسيما-1» ستانتسياسىنداعى اپاتتان كەيىن توقتاتىلعان رەاكتورلاردى قايتا ىسكە قوسۋ جۇمىستارىن جانداندىرۋ تۋرالى شەشىم قابىلداعان. بۇل تىزىمگە «كاسيۆادزاكي–كاريۆا» اەس-ءىنىڭ التىنشى جانە جەتىنشى ەنەرگوبلوكتارى دا ەنگىزىلگەن.
