1990 جىلعى قاڭتاردا بولعان ازەربايجانداعى وقيعالار تەك زيالى قاۋىمنىڭ عانا ەمەس، بۇكىل حالىقتىڭ كوممۋنيستىك رەجيمگە قارسى كوتەرىلىسى بولدى. بۇل تۋرالى ۋكراينا جوعارعى راداسىنىڭ بۇرىنعى دەپۋتاتى، ساياساتتانۋشى ۆلاديمير تسىبۋلكو Report اگەنتتىگىنىڭ شىعىس ەۋروپا بيۋروسىنا بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
«گورباچەۆ قالاعا اسكەر كىرگىزىپ، قارۋ قولدانۋ تۋرالى بۇيرىق بەردى. نەلىكتەن ءدال باكۋدى تاڭدادى؟ سەبەبى باكۋ كاۆكازداعى ەكونوميكالىق تۇرعىدان ەڭ دامىعان ورتالىق ەدى. كاۆكازدىڭ باستى رەسپۋبليكاسىن باسىپ-جانشۋ ارقىلى ءوز كۇشىن باسقا ايماقتارعا دا كورسەتۋگە مۇمكىندىك بولدى»، – دەدى ساياساتتانۋشى.
ونىڭ ايتۋىنشا، گورباچەۆ رەجيمى باكۋدەگى نارازىلىقتى باسپاسا، بۇل تولقۋلار بۇكىل كەڭەس وداعىن كۇيرەتەتىنىن تۇسىنگەن.
ء«بىز 1986–1987 جىلدارى قازاقستانداعى جاپپاي تولقۋلاردى، 1989 جىلى تبيليسيدە بولعان وقيعالاردى بىلەمىز. باكۋدەگى وقيعادان ءبىر جىل وتكەن سوڭ ۆيلنيۋستە دە قان توگىلدى. الايدا باكۋ كاۆكازدا عانا ەمەس، بۇكىل كسرو-دا كەڭەستىك رەجيمنىڭ قايتارىلمايتىن نۇكتەسىنە اينالدى. ودان كەيىن ۋكراينا، ليتۆا، بالتىق ەلدەرى كوتەرىلدى، اقىرىندا بۇل گورباچەۆ ءۇشىن قايعىلى اياقتالدى. باكۋدەن كەيىن ەلدەر ومىرلىك ساباق الدى. ولار رەسەيدەن ۇلكەن قانتوگىسسىز الىستاۋ مۇمكىن ەمەس ەكەنىن ءتۇسىندى»، – دەپ قوستى ساياساتتانۋشى.
