قازاقستاندىق بوكسشى، الەم چەمپيونى جانىبەك ءالىمحانۇلى دوپينگكە قاتىستى ءىس قارالۋ كەزەڭىندە بارلىق جەكپە-جەكتەردەن ۋاقىتشا شەتتەتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان كاسىپقوي بوكس فەدەراتسياسىنىڭ پرەزيدەنتى راحىمجان ەردەنبەكوۆ مالىمدەدى.
فەدەراتسيا باسشىسىنىڭ ايتۋىنشا، اقش-تاعى VADA ۇيىمىنان سپورتشىعا قاتىستى 34 بەتتەن تۇراتىن قورىتىندى ساراپتاما الىنعان. وندا «ۆ» دوپينگ-سىناما ناتيجەسى راستالىپ، بوكسشى اعزاسىندا تىيىم سالىنعان زاتتىڭ بار ەكەنى انىقتالعان.
"قازىرگى تاڭدا جانىبەك ءالىمحانۇلىنا قاتىستى يۋريسديكتسيانى قكبف ءوز موينىنا الدى. سەبەبى ول — ءبىزدىڭ فەدەراتسيانىڭ ليتسەنزيالانعان بوكسشىسى، ال ونىڭ قاتىسۋىمەن وتكەن سوڭعى جەكپە-جەك كەشى استانادا، فەدەراتسيانىڭ سانكتسياسىمەن ۇيىمداستىرىلعان. ەندىگى باستى ماسەلە — بۇل زاتتى ول سانالى تۇردە قابىلدادى ما، الدە اعزاعا باسقا جولمەن ءتۇستى مە", — دەدى راحىمجان ەردەنبەكوۆ.
قكبف پرەزيدەنتى 19 قاڭتاردا وتكەن تىڭداۋلاردىڭ ەگجەي-تەگجەيىن دە ءبولىستى. ونىڭ سوزىنشە، ءىس تاۋەلسىز ساراپشىلاردىڭ جانە قر تۋريزم جانە سپورت مينيسترلىگى وكىلدەرىنىڭ قاتىسۋىمەن قارالىپ جاتىر. تىڭداۋلار حالىقارالىق سپورتتىق قۇقىق تالاپتارىنا ساي، سپورتشىنىڭ كىناسىزدىك پرەزۋمپتسياسى ساقتالا وتىرىپ جۇرگىزىلۋدە.
"جانىبەككە كوپتەگەن سۇراق قويىلدى. ءساۋىر ايىنان بەرگى ءومىر جولى، انىقتالعان زاتتارعا دەيىنگى بارلىق كەزەڭ تولىق قارالدى. قازىرگى تاڭدا جاريا ەتىلمەيتىن جاڭا دەرەكتەر بار. تىڭداۋلار 23 قاڭتاردا جالعاسادى", — دەدى فەدەراتسيا باسشىسى.
ەردەنبەكوۆتىڭ ايتۋىنشا، ءىستى قاراۋ اياقتالعاننان كەيىن بارلىق ماتەريالدار WBO, IBF جانە وزگە دە حالىقارالىق ۇيىمدارعا جولدانادى. تيتۋلدارىنان ايىرۋ نەمەسە ايىرماۋ جونىندەگى شەشىمدى سول ۇيىمدار قابىلدايدى. ال ازىرگە تىڭداۋلار اياقتالعانعا دەيىن جانىبەك ءالىمحانۇلى جەكپە-جەكتەرگە قاتىسپايدى.
