Qazaqstandyq boksşy, älem chempiony Jänıbek Älımhanūly dopingke qatysty ıs qaralu kezeŋınde barlyq jekpe-jekterden uaqytşa şettetıldı, dep habarlaidy "Adyrna" ūlttyq portaly.
Būl turaly Qazaqstan käsıpqoi boks federasiiasynyŋ prezidentı Rahymjan Erdenbekov mälımdedı.
Federasiia basşysynyŋ aituynşa, AQŞ-taǧy VADA ūiymynan sportşyǧa qatysty 34 betten tūratyn qorytyndy saraptama alynǧan. Onda «V» doping-synama nätijesı rastalyp, boksşy aǧzasynda tyiym salynǧan zattyŋ bar ekenı anyqtalǧan.
"Qazırgı taŋda Jänıbek Älımhanūlyna qatysty iurisdiksiiany QKBF öz moinyna aldy. Sebebı ol — bızdıŋ federasiianyŋ lisenziialanǧan boksşysy, al onyŋ qatysuymen ötken soŋǧy jekpe-jek keşı Astanada, federasiianyŋ sanksiiasymen ūiymdastyrylǧan. Endıgı basty mäsele — būl zatty ol sanaly türde qabyldady ma, älde aǧzaǧa basqa jolmen tüstı me", — dedı Rahymjan Erdenbekov.
QKBF prezidentı 19 qaŋtarda ötken tyŋdaulardyŋ egjei-tegjeiın de bölıstı. Onyŋ sözınşe, ıs täuelsız sarapşylardyŋ jäne QR Turizm jäne sport ministrlıgı ökılderınıŋ qatysuymen qaralyp jatyr. Tyŋdaular halyqaralyq sporttyq qūqyq talaptaryna sai, sportşynyŋ kınäsızdık prezumpsiiasy saqtala otyryp jürgızılude.
"Jänıbekke köptegen sūraq qoiyldy. Säuır aiynan bergı ömır joly, anyqtalǧan zattarǧa deiıngı barlyq kezeŋ tolyq qaraldy. Qazırgı taŋda jariia etılmeitın jaŋa derekter bar. Tyŋdaular 23 qaŋtarda jalǧasady", — dedı federasiia basşysy.
Erdenbekovtıŋ aituynşa, ıstı qarau aiaqtalǧannan keiın barlyq materialdar WBO, IBF jäne özge de halyqaralyq ūiymdarǧa joldanady. Tituldarynan aiyru nemese aiyrmau jönındegı şeşımdı sol ūiymdar qabyldaidy. Al äzırge tyŋdaular aiaqtalǧanǧa deiın Jänıbek Älımhanūly jekpe-jekterge qatyspaidy.
