ىشكى ىستەر مينيسترلىگى شىمكەنت قالاسى پوليتسيا دەپارتامەنتىندە كادرلىق شەشىمدەر قابىلداندى، دەپ حابارلايدى "ادىرنا" ۇلتتىق پورتالى.
بۇل شەشىمدەر 21 جاستاعى ستۋدەنت نۇراي سەرىكبايدىڭ ولىمىنەن كەيىن قابىلدانعان.
ءىىم وزىندىك قاۋىپسىزدىك دەپارتامەنتىنىڭ مالىمەتىنشە، قاراتاۋ اۋدانى پوليتسيا باسقارماسى قىزمەتكەرلەرىنىڭ مارقۇمنىڭ تۋىستارىنىڭ وتىنىشتەرىن ءتيىستى دەڭگەيدە قاراماۋى مۇمكىن دەگەن دەرەك بويىنشا سوتقا دەيىنگى تەرگەۋ باستالدى. قىلمىستىق ءىس اياسىندا جەدەل ارەكەت ەتپەۋ جانە ۋاقىتىندا شارا قولدانباۋ فاكتىلەرى جان-جاقتى تەكسەرىلەدى.
ۆەدومستۆونىڭ حابارلاۋىنشا، تەرگەۋ ناتيجەسىنە قاراي لاۋازىمدى تۇلعالاردىڭ ارەكەتىنە زاڭ اياسىندا قۇقىقتىق باعا بەرىلەدى. سونىمەن قاتار قىزمەتتىك تەكسەرىس جۇرگىزىلىپ، ونىڭ قورىتىندىسى بويىنشا تارتىپتىك شارالار قابىلدانعان.
«قۇقىقتىق ءتارتىپتى ءتيىستى دەڭگەيدە قامتاماسىز ەتپەگەنى ءۇشىن شىمكەنت قالاسى پوليتسيا دەپارتامەنتىنىڭ باستىعى مەن ونىڭ ءبىرىنشى ورىنباسارى قىزمەتتەرىنەن بوساتىلدى. سونداي-اق بىرقاتار لاۋازىمدى تۇلعالار ىشكى ىستەر ورگاندارىنان شىعارىلدى»، – دەلىنگەن ءىىم حابارلاماسىندا.
مينيسترلىك زاڭ بۇزۋشىلىقتارعا، زورلىق-زومبىلىق پەن قاتىگەزدىككە قاتىستى قاتاڭ ءارى ءپرينتسيپتى ۇستانىمدا ەكەنىن اتاپ ءوتتى.
بۇل وقيعا تۋرالى بۇگىنگى وتكەن ۇلتتىق قۇرىلتايدا پرەزيدەنت توقاەۆ تا ارنايى توقتالعان بولاتىن.
"شىمكەنتتە نۇراي ەسىمدى بويجەتكەننىڭ كىسى قولىنان قازا بولۋى بۇكىل ەلدى دۇرلىكتىردى. ۇلتتىق قۇرىلتايعا وسى وقيعا بويىنشا 130-دان استام ءوتىنىش كەلىپ ءتۇستى. كۇدىكتىنىڭ نۇرايدى اڭدىپ، مازا بەرمەي، قوقان-لوقى كورسەتكەنى انىقتالىپ وتىر. اقىرى، ونىڭ ارتى ادام ولىمىنە اكەپ سوقتىردى. وسىعان بايلانىستى ىشكى ىستەر مينيسترلىگىنە شىمكەنت قالالىق دەپارتامەنتىنىڭ ارەكەتىنە قۇقىقتىق باعا بەرۋدى تاپسىردىم. باس پروكۋرور دا بۇل ماسەلەنى مۇقيات تەكسەرەدى", - دەگەن قاسىم-جومارت توقاەۆ.
ايتا كەتەيىك، مارقۇم نۇراي سەرىكبايدىڭ ولىمىنە كۇدىكتى رەتىندە 28 جاستاعى شىمكەنت قالاسىنىڭ تۇرعىنى ۇستالىپ، ۋاقىتشا ۇستاۋ يزولياتورىنا قامالعان بولاتىن.
