Işkı ıster ministrlıgı Şymkent qalasy polisiia departamentınde kadrlyq şeşımder qabyldandy, dep habarlaidy "Adyrna" ūlttyq portaly.
Būl şeşımder 21 jastaǧy student Nūrai Serıkbaidyŋ ölımınen keiın qabyldanǧan.
IIM Özındık qauıpsızdık departamentınıŋ mälımetınşe, Qaratau audany polisiia basqarmasy qyzmetkerlerınıŋ marqūmnyŋ tuystarynyŋ ötınışterın tiıstı deŋgeide qaramauy mümkın degen derek boiynşa sotqa deiıngı tergeu bastaldy. Qylmystyq ıs aiasynda jedel äreket etpeu jäne uaqytynda şara qoldanbau faktılerı jan-jaqty tekserıledı.
Vedomstvonyŋ habarlauynşa, tergeu nätijesıne qarai lauazymdy tūlǧalardyŋ äreketıne zaŋ aiasynda qūqyqtyq baǧa berıledı. Sonymen qatar qyzmettık tekserıs jürgızılıp, onyŋ qorytyndysy boiynşa tärtıptık şaralar qabyldanǧan.
«Qūqyqtyq tärtıptı tiıstı deŋgeide qamtamasyz etpegenı üşın Şymkent qalasy polisiia departamentınıŋ bastyǧy men onyŋ bırınşı orynbasary qyzmetterınen bosatyldy. Sondai-aq bırqatar lauazymdy tūlǧalar ışkı ıster organdarynan şyǧaryldy», – delıngen IIM habarlamasynda.
Ministrlık zaŋ būzuşylyqtarǧa, zorlyq-zombylyq pen qatygezdıkke qatysty qataŋ ärı prinsiptı ūstanymda ekenın atap öttı.
Būl oqiǧa turaly bügıngı ötken ūlttyq qūryltaida Prezident Toqaev ta arnaiy toqtalǧan bolatyn.
"Şymkentte Nūrai esımdı boijetkennıŋ kısı qolynan qaza boluy bükıl eldı dürlıktırdı. Ūlttyq qūryltaiǧa osy oqiǧa boiynşa 130-dan astam ötınış kelıp tüstı. Küdıktınıŋ Nūraidy aŋdyp, maza bermei, qoqan-loqy körsetkenı anyqtalyp otyr. Aqyry, onyŋ arty adam ölımıne äkep soqtyrdy. Osyǧan bailanysty Işkı ıster ministrlıgıne Şymkent qalalyq departamentınıŋ äreketıne qūqyqtyq baǧa berudı tapsyrdym. Bas prokuror da būl mäselenı mūqiiat tekseredı", - degen Qasym-Jomart Toqaev.
Aita keteiık, marqūm Nūrai Serıkbaidyŋ ölımıne küdıktı retınde 28 jastaǧy Şymkent qalasynyŋ tūrǧyny ūstalyp, uaqytşa ūstau izoliatoryna qamalǧan bolatyn.
